جنوبی وزیرستان سے پولیس اہلکار سمیت 4 افراد اغوا، نوجوان کی لاش ذبح شدہ برآمد

وانا (ل و/د م و) پاکستان کے شورش زدہ قبائلی ضلع جنوبی وزیرستان میں گزشتہ 24 گھنٹوں کے دوران دہشت گردوں نے چار سنگین واقعات انجام دیے، جن میں نوجوان، پولیس اہلکار اور ڈرائیورز اغواء ہوئے جبکہ ایک نوجوان کی لاش ذبح شدہ حالت میں برآمد ہوئی۔

پولیس اور مقامی ذرائع کے مطابق وانا کے علاقے خامرنگ میں عسکریت پسندوں نے نوجوان کامران ولد ماجڑ کو اس کے گھر سے اغواء کیا۔ جمعرات کو کامران کی ذبح شدہ لاش خمرنگ کے علاقے دوے خولہ سے برآمد ہوئی۔ نوجوان کا تعلق قوم خوجل خیل سے تھا اور پولیس کے مطابق اس کی لاش کی حالت انتہائی خونی تھی، جس میں اس کا سر تن سے جدا تھا۔

اسی دوران، وانا کے علاقے رستم بازار میں مستری کے ساتھ کام کرنے والے 14 سالہ سلیمان ولد زرک خان کو بھی نامعلوم شدت پسندوں نے اغواء کر لیا۔ پولیس ذرائع کے مطابق سلیمان کے اغواء کے محرکات ابھی تک معلوم نہیں ہو سکے، تاہم تحقیقات جاری ہیں۔

مزید برآں، جنوبی وزیرستان کی لوئر برمل تحصیل کے علاقے دانہ میں مسلح شدت پسندوں نے ایک پولیس اہلکار اور ڈرائیور کو اغواء کر کے نامعلوم مقام پر منتقل کر دیا، جبکہ پولیس اہلکار کی فیلڈر کار کو آگ لگا دی گئی۔ پولیس نے واقعے کی تحقیقات شروع کر دی ہیں۔

اسی طرح، جنوبی وزیرستان کے علاقے وچہ دانہ الگڈ میں ٹھیکیدار حبیب کی بلاک سیمنٹ سے بھری مزدہ گاڑی کے ڈرائیور فضل کریم کو بھی مسلح طالبان نے اغواء کر لیا۔

پولیس اور سیکورٹی فورسز نے تمام واقعات کی تحقیقات شروع کر کے علاقے میں سرچ آپریشن بھی شروع کر دیا ہے۔