جنوبی وزیرستان لوئر میں کرفیو نافذ، بازار بند، آمدورفت پر پابندی عائد

وانا (نمائندہ ڈیلی اردو) پاکستان کے شورش زدہ صوبہ خیبر پختونخوا کے قبائلی ضلع جنوبی وزیرستان لوئر کی تحصیل وانا میں سیکیورٹی صورتحال کے پیش نظر کرفیو نافذ کر دیا گیا ہے۔

ضلعی انتظامیہ کے مطابق یکم اگست کو صبح 6 بجے سے شام 7 بجے تک کرفیو نافذ رہے گا، جس کے دوران ہر قسم کی نقل و حرکت پر مکمل پابندی ہوگی۔

جاری اعلامیے کے مطابق کرفیو کے دوران تمام بازار، مارکیٹیں اور کاروباری مراکز بند رہیں گے، جبکہ شہریوں کو بلا ضرورت گھروں سے باہر نہ نکلنے کی ہدایت کی گئی ہے۔

انتظامیہ نے واضح کیا ہے کہ صرف ہنگامی صورتحال میں پولیس یا سیکیورٹی فورسز کی پیشگی اجازت، شناختی کارڈ اور متعلقہ دستاویزات جمع کرانے کے بعد سفر کی اجازت دی جائے گی۔

اعلامیے میں شہریوں کو ہدایت کی گئی ہے کہ سیکیورٹی چیک پوسٹس کے قریب پہنچنے پر گاڑیاں تقریباً 50 میٹر پہلے روکیں اور گاڑی میں موجود تمام افراد نیچے اتر جائیں تاکہ تلاشی کا عمل مکمل کیا جا سکے۔

ضلعی انتظامیہ نے خبردار کیا ہے کہ کرفیو کی خلاف ورزی کی صورت میں ذمہ داری متعلقہ فرد پر عائد ہوگی اور قانونی کارروائی کی جا سکتی ہے۔

واضح رہے کہ جنوبی وزیرستان لوئر میں حالیہ دہشت گرد حملوں کے بعد سیکیورٹی صورتحال کے پیش نظر علاقے میں اضافی اقدامات کیے جا رہے ہیں، جبکہ ممکنہ سیکیورٹی کارروائیوں کے باعث آمدورفت کو محدود کیا گیا ہے۔