جنوبی وزیرستان میں 48 گھنٹوں کے لیے کرفیو نافذ، اہم شاہراہوں پر آمدورفت بند

جنوبی وزیرستان(ڈیلی اردو) خیبرپختونخواہ کے شورش زدہ قبائلی ضلع جنوبی وزیرستان اپر کی تحصیل سرویکئی کے سب ڈویژن سرویکئی میں سیکیورٹی صورتحال کے پیش نظر 48 گھنٹوں کے لیے کرفیو نافذ کر دیا گیا ہے۔

حکام کے مطابق کرفیو 9 ستمبر صبح 6 بجے سے 11 ستمبر صبح 6 بجے تک جاری رہے گا۔ اس دوران تمام بازار بند رہیں گے جبکہ ہر قسم کی آمدورفت اور ٹریفک پر پابندی ہوگی۔

کرفیو کے دوران چگملائی، سپلاتوئی، شاہور، مولے خان سرائے تا مادیجان اور سرویکئی، مولے خان سرائے، رغزئی، بروند تا سپینکئی سمیت مختلف اہم راستوں پر آمدورفت بھی ممنوع قرار دی گئی ہے۔

حکام نے قانون نافذ کرنے والے اداروں، ایمبولینس، فائر بریگیڈ اور دیگر ہنگامی خدمات کو کرفیو کی پابندی سے مستثنیٰ قرار دیا ہے۔ شہریوں کو ہنگامی صورتحال میں پولیس یا سیکیورٹی فورسز کی اجازت سے متاثرہ علاقوں میں سفر کی اجازت ہوگی۔

انتظامیہ نے شہریوں کو ہدایت کی ہے کہ ناگزیر سفر کی صورت میں شناختی کارڈ اور گاڑی کے ضروری کاغذات لازماً ساتھ رکھیں۔ سیکیورٹی فورسز کی موجودگی میں گاڑی کو مقررہ مقام سے 50 میٹر پہلے روکنے کی ہدایت بھی کی گئی ہے۔

حکام نے خبردار کیا ہے کہ کرفیو کی خلاف ورزی کرنے والوں کے خلاف قانون کے مطابق کارروائی کی جائے گی۔

Hashtags:
#SouthWaziristan #KhyberPakhtunkhwa #Curfew #Security #Pakistan #Sarai