جنوبی وزیرستان میں پرانا مارٹر گولہ پھٹنے سے 2 بچے زخمی

جنوبی وزیرستان(ڈیلی اردو) خیبرپختونخواہ کے شورش زدہ قبائلی ضلع لوئر جنوبی وزیرستان کی تحصیل برمل کے علاقے اعظم ورسک میں بارودی مواد پھٹنے سے دو بچے زخمی ہوگئے، جنہیں طبی امداد کے لیے ڈی ایچ کیو اسپتال وانا منتقل کردیا گیا۔

پولیس کے مطابق زخمی بچوں کی شناخت عمران اور خان سید کے نام سے ہوئی ہے۔ اسپتال ذرائع کا کہنا ہے کہ دونوں بچوں کی حالت خطرے سے باہر ہے۔

ابتدائی معلومات کے مطابق بچوں کو زمین سے ایک پرانا مارٹر گولہ ملا تھا۔ دونوں بچے مبینہ طور پر اسے اٹھانے کے بعد اس کے ساتھ چھیڑ چھاڑ کر رہے تھے کہ اچانک دھماکا ہوگیا، جس کے نتیجے میں وہ زخمی ہوئے۔ اہل خانہ نے بھی واقعے کی تصدیق کی ہے۔

پولیس حکام کا کہنا ہے کہ دھماکے میں موجود مواد اور واقعے کی حتمی نوعیت کا تعین تحقیقات مکمل ہونے کے بعد کیا جائے گا۔ ڈی ایس پی نادر خان کے مطابق واقعے کی ابتدائی رپورٹ درج کرلی گئی ہے جبکہ مزید تفتیش جاری ہے۔

دوسری جانب مقامی لوگوں نے مطالبہ کیا ہے کہ علاقے میں موجود ممکنہ بارودی سرنگوں، پرانے مارٹر گولوں اور دیگر غیر فعال جنگی مواد کی نشاندہی کرکے انہیں محفوظ طریقے سے تلف کیا جائے تاکہ مستقبل میں ایسے واقعات کی روک تھام ہوسکے۔

اہل علاقہ نے زخمی بچوں کے خاندان کو مالی معاونت فراہم کرنے کا بھی مطالبہ کیا ہے۔ علاقے میں ماضی میں بھی بارودی سرنگوں اور جنگی مواد کے باعث حادثات رپورٹ ہوتے رہے ہیں، جبکہ شہریوں کو خطرناک اور مشتبہ اشیا سے دور رہنے کے حوالے سے آگاہی بھی دی جاتی رہی ہے۔