جنوبی وزیرستان میں کرفیو نافذ، دہشتگرد فائرنگ سے شہری زخمی

وانا (د م و/(ل و) پاکستان کے قبائلی ضلع جنوبی وزیرستان: ضلع جنوبی وزیرستان کے اپر اور لوئر کے مختلف علاقوں میں جمعرات 21 اگست 2025 کو صبح 6 بجے سے شام 7 بجے تک مکمل کرفیو نافذ کردیا گیا ہے۔

انتظامیہ کے جاری کردہ نوٹیفیکیشن کے مطابق، کرفیو کے دوران ہر قسم کی نقل و حرکت پر پابندی ہوگی اور تمام بازار و مارکیٹیں بند رہیں گی۔ کرفیو والے علاقوں میں جنوبی وزیرستان لوئر کے وانا، شکئی، تیارزہ گیٹ، کربکوٹ، تنائی اور دیگر علاقے شامل ہیں، جبکہ جنوبی وزیرستان اپر کے علاقے تادہ چینہ، مکین بی بی رغزئی، سراروغہ، کوٹکائی، سپینکئی رغزئی، کانیگرم، شیرونگی اور دیگر شامل ہیں۔

نوٹیفیکیشن میں کہا گیا ہے کہ کرفیو کے دوران صرف ایمرجنسی کی صورت میں پولیس یا سیکیورٹی فورسز کی اجازت اور شناختی کارڈ و ضروری کاغذات کے بعد سفر ممکن ہوگا۔ سکیورٹی فورسز کی گاڑی دیکھ کر گاڑی کو 100 میٹر فاصلے پر سڑک سے نیچے اتار دینا لازمی ہے۔

اسی دوران اعظم ورسک کے علاقے میں دہشتگردوں کی فائرنگ سے ایک شہری زخمی ہوگیا۔ زخمی شہری دکان جا رہا تھا اور اسے فوری طور پر ہیڈکوارٹر وانا ہسپتال منتقل کر دیا گیا۔