جوہری پروگرام دوبارہ شروع ہوا تو ایران پر پھر اسرائیلی و امریکی حملے کیے جائیں گے، صدر ٹرمپ

فلوریڈا (ڈیلی اردو، اے پی، اے ایف پی، روئٹرز) امریکی صدر ٹرمپ کا کہنا ہے کہ جون کی مختصر جنگ کے بعد اب اگر ایران نے اپنے جوہری پروگرام کو دوبارہ بنانے کی کوشش کی، تو ایرانی رہنما 'نتائج جانتے ہیں'۔ انہوں نے یہ بات فلوریڈا میں اسرائیلی وزیر اعظم نیتن یاہو سے ملاقات کے بعد کہی۔

امریکی صدر ڈونلڈ ٹرمپ نے پیر کے روز دھمکی دی کہ اگر ایران نے اپنے جوہری ہتھیاروں کی تنصیبات کو دوبارہ بنانے کی کوشش کی، تو اس پر مزید اسرائیلی یا امریکی حملے کیے جا سکتے ہیں۔

ٹرمپ نے فلوریڈا میں اپنی مار- اے -لاگو رہائش گاہ پر اسرائیلی وزیر اعظم بنجیمن نیتن یاہو کے دورے کے موقع پر صحافیوں سے بات چیت کرتے ہوئے کہا، “اب میں نے سنا ہے کہ ایران دوبارہ تعمیر کرنے کی کوشش کر رہا ہے۔ اور اگر وہ ایسا کر رہے ہیں، تو ہمیں انہیں روکنا پڑے گا۔ ہم انہیں تباہ کر دیں گے۔ ہم انہیں جہنم میں ملا دیں گے۔ لیکن امید ہے کہ ایسا نہیں ہو رہا ہے۔”

ایران اور اسرائیل کے درمیان جون میں دو ہفتوں تک ایک دوسرے پر حملوں کا تبادلہ ہوا تھا، جو 13 اور 24 جون کے درمیان جاری رہی۔ اسی دوران امریکہ نے 22 جون کو ایران کے تین اہم مقامات پر بھاری ہتھیاروں سے حملہ کیا، جس کا اس نے'آپریشن مڈ نائٹ ہیمر' کا نام دیا تھا۔

حملوں میں ایران کی جوہری صلاحیتوں کا کیا ہوا؟

صدر ٹرمپ نے پہلے ایک بیان میں کہا تھا کہ جون میں جوہری افزودگی کے اہم مقامات پر اسرائیلی اور بعد میں امریکی حملوں کے سے تہران کی جوہری صلاحیتوں کو "مکمل طور پر تباہ اور ختم" کر دیا گیا ہے۔

لیکن انٹیلیجنس ایجنسیوں اور پینٹاگون کی جانب سے کیے گئے محتاط امریکی جائزوں نے اندازہ لگایا ہے کہ اگر ایران جوہری ہتھیاروں کی  کوشش جاری رکھے، تو یہ حملے صرف چند ماہ یا دو سال تک اسے پیچھے ہٹنے پر مجبور کر سکتے ہیں۔

اسرائیلی میڈيا کی رپورٹوں میں ایران کی تعمیر نو کی کوششوں کی بات کہی گئی ہے، خاص طور پر طویل فاصلے تک مار کرنے والی ایرانی میزائل کی صلاحیتوں کے بارے میں، کیونکہ ایسے روایتی ہتھیاروں کو بھی اسرائیل کو نشانہ بنانے کے لیے استعمال کی جا سکتا ہے۔

ادھر ایران کا دعویٰ ہے کہ وہ اب ملک میں کسی بھی مقام پر جوہری ہتھیاروں کے لیے یورینیم کی افزودگی نہیں کر رہا ہے۔

ایران کا 'فوری سخت ردعمل' کا انتباہ

ٹرمپ نے کہا کہ یہ ممکن تو ہے، تاہم اس بات کی تصدیق بھی نہیں کی جا سکتی کہ جون میں امریکہ کی طرف تباہ کیے گئے نطانز، فردو اور اصفہان کے علاوہ دیگر مقامات کی جوہری صلاحیتوں کو، ایران دوبارہ بنانے کی کوشش کر رہا ہے۔

صدر ٹرمپ نے کہا، "ہمیں بخوبی معلوم ہے کہ وہ کہاں جا رہے ہیں، وہ کیا کر رہے ہیں، اور مجھے امید ہے کہ وہ ایسا نہیں کر رہے ہیں کیونکہ ہم بی 2 بم پر ایندھن ضائع نہیں کرنا چاہتے۔

انہوں نے کہا کہ تہران کے رہنما "نتائج جانتے ہیں" اگر حکومت نے جوہری ہتھیاروں کی طرف بڑھنے کی کوشش کی تو اس کا انجام “بہت طاقتور، شاید پچھلی بار سے بھی زیادہ طاقتور ہو گا۔”

ادھر ایران کے مذہبی رہنما آیت اللہ علی خامنہ ای کے مشیر علی شمخانی نے ٹرمپ کے اس بیان پر اپنے فوری رد عمل میں آن لائن جواب دیتے ہوئے کہا کہ ایران کی میزائل صلاحیت اور دفاع “قابو پانے یا اجازت پر مبنی نہیں ہے۔”

انہوں نے کہا کہ “کسی بھی جارحیت کو اس کے منصوبہ سازوں کے تصور سے کہیں زیادہ فوری طور پر سخت ردعمل کا سامنا کرنا پڑے گا۔”

گزشتہ ہفتے اسرائیلی وزیر اعظم نیتن یاہو نے کہا تھا کہ وہ ایران سے متعلق رپورٹس سے آگاہ ہیں لیکن اسرائیل کسی اور تصادم کا خواہاں نہیں ہے۔ انہوں نے کہا تھا کہ البتہ وہ اس معاملے پر ٹرمپ سے بات کرنے کا ارادہ رکھتے ہیں۔