جیوانی میں تعمیراتی کمپنی کی گاڑی پر حملہ، 4 کارکن ہلاک

گوادر (ڈیلی اردو) بلوچستان کے شورش زدہ ضلع گوادر میں جیوانی کے علاقے میں نامعلوم مسلح افراد نے تعمیراتی کمپنی کے ملازمین کو لے جانے والی گاڑی کو نشانہ بنا دیا، جس کے نتیجے میں چار کارکن ہلاک ہوگئے۔ 

پولیس ذرائع کے مطابق واقعہ اس وقت پیش آیا جب تعمیراتی کمپنی کے ملازمین اپنے کام کے سلسلے میں سفر کر رہے تھے اور حملہ آوروں نے گاڑی پر فائرنگ کردی۔ ابتدائی اطلاعات میں حملے میں بی ایل اے کے ملوث ہونے کا شبہ ظاہر کیا گیا ہے، تاہم واقعے کی ذمہ داری اور حملے کی مکمل نوعیت کے حوالے سے حتمی تصدیق تاحال سامنے نہیں آئی۔

بعض ذرائع نے حملے میں دیسی ساختہ بم کے ممکنہ استعمال کا بھی ذکر کیا ہے، جس کی تصدیق کے لیے جائے وقوعہ سے شواہد اکٹھے کیے جارہے ہیں۔ ہلاک ہونے والوں میں غلام مصطفیٰ، صنم مسیح، کنول شہزاد اور دانش اقبال شامل ہیں، جن کا تعلق پنجاب، شیخوپورہ، کوئٹہ اور ضلع کرک سے بتایا جاتا ہے۔

واقعے کے بعد سیکیورٹی اداروں نے علاقے میں کارروائی شروع کردی جبکہ حملہ آوروں اور واقعے کے محرکات سے متعلق تحقیقات جاری ہیں۔ تعمیراتی کارکنوں کو نشانہ بنائے جانے کے واقعے سے گوادر اور گردونواح میں ترقیاتی منصوبوں سے وابستہ افراد کی سیکیورٹی پر بھی تشویش پیدا ہوگئی ہے۔