حوثی حملوں کے خلاف بھرپور جواب دیں گے: سعودی اتحاد

ریاض(ڈیلی اردو) سعودی قیادت میں قائم اتحادی افواج نے سعودی عرب میں میزائل اور ڈرون حملوں کے بعد حوثی باغیوں کو بھرپور جواب دینے کا اعلان کردیا ہے۔ اتحادی افواج کے ترجمان میجر جنرل ترکی المالکی نے کہا ہے کہ شہریوں اور شہری تنصیبات کو نشانہ بنانے کی کسی بھی کوشش کو برداشت نہیں کیا جائے گا۔

ترکی المالکی کے مطابق پیر کے روز خمیس مشیط، ابہا اور طائف کے شہری علاقوں کو بیلسٹک میزائلوں اور ڈرونز کے ذریعے نشانہ بنایا گیا، جس کے نتیجے میں 13 شہری زخمی ہوئے جبکہ 7 مکانات اور 2 گاڑیوں کو نقصان پہنچا۔

ترجمان نے کہا کہ سعودی عرب کی خودمختاری، شہری آبادی اور شہری تنصیبات کے تحفظ کے لیے ضروری دفاعی اقدامات کیے جائیں گے۔ ان کے مطابق اتحادی افواج کسی بھی حملے کا جواب بین الاقوامی قانون اور حقِ دفاع کے اصولوں کے تحت دیں گی۔

دوسری جانب حوثی باغیوں نے سعودی عرب میں فوجی اہداف کو نشانہ بنانے کا دعویٰ کیا ہے، جن میں کنگ خالد ایئربیس بھی شامل ہے۔ دونوں جانب سے سامنے آنے والے دعووں کے بعد خطے میں کشیدگی مزید بڑھنے کا خدشہ ظاہر کیا جارہا ہے۔