حوثی وزیر اعظم کی ہلاکت کے بعد اسرائیل پر راکٹ حملہ ناکام

یروشلم (ڈیلی اردو/نیوز ایجنسیاں) اسرائیلی فوج کے مطابق بدھ کو یمن سے داغا گیا ایک راکٹ فضا میں تباہ کر دیا گیا۔ یہ راکٹ حوثی باغیوں کی جانب سے ان کے وزیر اعظم کی ہلاکت کا بدلہ لینے کے اعلان کے بعد داغا گیا تھا۔

گزشتہ ہفتے ایک اسرائیلی حملے میں یمن میں حوثی باغیوں کی انتظامیہ کے وزیر اعظم احمد غالب ناصر الرہوی اور 11 دیگر اعلیٰ عہدیدار مارے گئے تھے۔ واضح رہے کہ عالمی برداری حوثیوں کی حکومت کو تسلیم نہیں کرتی۔

حوثی رہنما عبدالملک الحوثی نے اتوار کو ایک تقریر میں اسرائیل کے خلاف میزائل اور ڈرون حملے جاری رکھنے اور ان میں شدت لانے کا اعلان کیا تھا۔

ایرانی حمایت یافتہ حوثی باغی اکتوبر 2023 میں غزہ کی جنگ کے آغاز کے بعد سے اسرائیل پر متعدد مرتبہ میزائل اور ڈرون حملے کر چکے ہیں، جنہیں وہ فلسطینیوں کی عملی حمایت قرار دیتے ہیں۔

جوابی کارروائی میں اسرائیل نے یمن کے حوثی کنٹرول والے علاقوں بشمول بندرگاہوں اور دارالحکومت صنعاء پر متعدد فضائی حملے کیے ہیں۔