خیبر: اے این پی صدر کا حجرہ دہشتگردوں نے بارودی مواد سے اڑا دیا

خیبر (نمائندہ ڈیلی اردو)پاکستان کے شورش زدہ صوبے خیبر پختونخوا کے قبائلی ضلع خیبر میں دہشتگردوں نے عوامی نیشنل پارٹی (اے این پی) کے صدر سفیر امن عبدالرزاق آفریدی کے حجرے کو بارودی مواد سے اڑا دیا۔

مقامی ذرائع کے مطابق یہ واقعہ خیبر کی دورافتادہ وادی تیراہ میں پیش آیا۔

اس سے قبل بھی اے این پی کے صدر پر قیام امن کے سلسلے میں حملہ ہو چکا ہے اور انہیں بار بار دھمکیاں دی گئی ہیں تاکہ وہ امن کی جدوجہد سے دستبردار ہو جائیں۔

پولیس نے موقع پر پہنچ کر علاقے کو گھیرے میں لے لیا اور ابتدائی تفتیش کے مطابق حجرے کو بارودی مواد سے اڑا دیا گیا۔

اس واقعے سے علاقے میں خوف و ہراس پھیل گیا اور مقامی رہائشیوں نے سکیورٹی فورسز سے حفاظت کے لیے اقدامات بڑھانے کا مطالبہ کیا ہے۔