حوثیوں کا سعودی عرب میں آرامکو تنصیبات اور خمیس مشیط ایئر بیس پر حملوں کا دعویٰ

صنعاء(ڈیلی اردو) یمن میں ایران نواز حوثی باغیوں نے سعودی عرب میں آرامکو کی تنصیبات اور خمیس مشیط ایئر بیس کو نشانہ بنانے کا دعویٰ کیا ہے۔

حوثی باغیوں کی مسلح افواج کی جانب سے بدھ کو جاری بیان میں کہا گیا ہے کہ سعودی عرب میں دو الگ کارروائیاں کی گئیں۔ بیان کے مطابق پہلی کارروائی میں ینبع کے علاقے میں سعودی آرامکو کی تنصیبات کو بیلسٹک میزائلوں اور ڈرونز کے ذریعے نشانہ بنایا گیا، جبکہ دوسری کارروائی میں خمیس مشیط ایئر بیس پر بیلسٹک میزائل داغے گئے۔

حوثیوں نے دعویٰ کیا ہے کہ دونوں کارروائیوں میں مقررہ اہداف کو براہِ راست نشانہ بنایا گیا اور بڑے پیمانے پر نقصان پہنچا، تاہم ان دعوؤں کی آزادانہ طور پر تصدیق نہیں ہوسکی۔

حوثی گروہ نے اپنے بیان میں کہا ہے کہ سعودی عرب کے اندر اہداف کے خلاف کارروائیاں جاری رکھی جائیں گی اور یہ سلسلہ یمن کے خلاف فوجی کارروائیوں اور محاصرے کے خاتمے تک جاری رہے گا۔