خیبر: لنڈی کوتل اور وادی تیراہ میں فائرنگ، ایف سی اہلکار سمیت دو افراد ہلاک

خیبر (نمائندگان ڈیلی اردو) پاکستان کے شورش زدہ صوبے خیبر پختونخوا کے قبائلی ضلع خیبر میں شدت پسندوں اور سیکورٹی فورسز کے مختلف واقعات میں ایف سی اہلکار سمیت دو افراد ہلاک ہوگئے۔

ایف سی اہلکار ہلاک

ضلع خیبر کے علاقے لنڈی کوتل سلطان خیل مزرینہ میں نامعلوم مسلح شدت پسندوں کی فائرنگ سے فرنٹیئر کور (ایف سی) کے اہلکار جواد آفریدی ہلاک ہوگئے۔ پولیس کے مطابق اہلکار چھٹی پر اپنے گاؤں آیا ہوا تھا کہ حملے کا نشانہ بنا۔

وادی تیراہ: فورسز کی فائرنگ سے مقامی شخص ہلاک

ادھر وادی تیراہ کے علاقے سڑے کنڈاؤ زخہ خیل میں سیکورٹی فورسز کی مبینہ فائرنگ سے ایک مقامی دکاندار نظیر ہلاک ہوگیا۔

 ذرائع کے مطابق نظیر ڈبل کیبن گاڑی میں ایک خاتون کو ایمرجنسی کی حالت میں اسپتال منتقل کر رہا تھا کہ مومند غوز کے مقام پر قائم چیک پوسٹ سے ان کی گاڑی پر فائرنگ کی گئی۔

حادثے کے وقت گاڑی میں خواتین اور ڈرائیور بھی موجود تھے، جو معجزانہ طور پر محفوظ رہے، جبکہ نظیر فائرنگ کی زد میں آ کر موقع پر ہلاک ہوگئے۔