خیبر میں سیکیورٹی فورسز کا آپریشن، کمانڈر سمیت 4 دہشتگرد ہلاک

خیبر(ڈیلی اردو) خیبرپختونخواہ کے شورش زدہ قبائلی ضلع خیبر میں سیکیورٹی فورسز نے علاقے باڑہ میں خفیہ اطلاعات کی بنیاد پر کارروائی کرتے ہوئے ایک کمانڈر سمیت 4 دہشتگردوں کو ہلاک کر دیا۔ ذرائع کے مطابق کارروائی اکاخیل کے علاقے حاجیانون کلے میں دہشتگردوں کی موجودگی کی اطلاع پر کی گئی، جہاں سیکیورٹی اہلکاروں اور دہشتگردوں کے درمیان فائرنگ کا تبادلہ ہوا۔

ذرائع کے مطابق کارروائی میں ہلاک ہونے والوں کی شناخت کمانڈر خالد عمر غازی، ملک عرب گل، اریانہ اور حنظلہ کے نام سے ہوئی ہے۔ خالد عمر غازی مبینہ طور پر چند ماہ قبل پشاور کے حیات آباد ٹول پلازہ کی ناکہ بندی اور سیکیورٹی فورسز کے خلاف مختلف حملوں میں ملوث تھا۔ ذرائع کا دعویٰ ہے کہ وہ باڑہ اور تیراہ میدان کے علاقوں میں بھی دہشتگرد سرگرمیوں میں مطلوب تھا۔

کارروائی کے بعد سیکیورٹی فورسز نے علاقے میں سرچ آپریشن مزید وسیع کر دیا ہے جبکہ ممکنہ طور پر موجود دیگر دہشتگردوں اور ان کے ٹھکانوں کا سراغ لگانے کے لیے سیکیورٹی اقدامات جاری ہیں۔