خیبر پختونخوا میں دہشتگردی کے 605 واقعات، 138 عام شہری اور 79 پولیس اہلکار ہلاک

پشاور (ڈیلی اردو )  سنٹرل پولیس آفس کی رپورٹ کے مطابق خیبر پختونخوا میں رواں سال کے ابتدائی آٹھ ماہ کے دوران دہشت گردی کے واقعات میں تشویشناک اضافہ ریکارڈ کیا گیا ہے۔ اس عرصے کے دوران صوبے میں مجموعی طور پر 605 دہشت گردی کے واقعات رپورٹ ہوئے۔

رپورٹ میں بتایا گیا کہ رواں سال دہشت گردی کے مختلف حملوں میں 138 عام شہری ہلاک جبکہ 352 زخمی ہوئے۔ اسی طرح صوبے کی پولیس بھی ان حملوں کا براہِ راست نشانہ بنی، جس کے نتیجے میں اب تک 79 پولیس اہلکار ہلاک اور 130 زخمی ہوئے۔

اگست میں دہشت گردی کی شدت

رپورٹ کے مطابق صرف اگست 2025 کے دوران صوبے میں دہشت گردی کے 129 واقعات ریکارڈ ہوئے۔ ان میں 13 پولیس اہلکار ہلاک اور 46 زخمی ہوئے جبکہ 17 عام شہری ہلاک اور 51 زخمی ہوئے۔

گزشتہ ماہ دہشت گردی کے سب سے زیادہ 42 واقعات میں 186 ملزمان کو نامزد کیا گیا جن میں سے 8 ہلاک ہوئے۔

دہشت گردوں کے خلاف کارروائیاں

رواں سال اب تک دہشت گردی کے مقدمات میں 351 ملزمان کو نامزد کیا گیا، جن میں سے 32 ہلاک اور 5 گرفتار ہوئے ہیں۔

سب سے زیادہ متاثرہ اضلاع

رپورٹ میں بتایا گیا ہے کہ صوبے کے بعض اضلاع میں دہشت گردی کے واقعات کی تعداد نمایاں رہی، جن میں:

شمالی وزیرستان میں 15 واقعات، جنوبی وزیرستان میں 14 واقعات اور دیر میں 11 واقعات شاممل ہیں۔

پولیس حکام کے مطابق دہشت گردی کے بڑھتے ہوئے حملے سیکیورٹی اداروں کے لیے سنگین چیلنج بنے ہوئے ہیں اور اس کے تدارک کے لیے کارروائیاں تیز کی جا رہی ہیں۔