خیبرپختونخوا اور بلوچستان میں سیکیورٹی آپریشنز، 5 دہشتگرد ہلاک

اسلام آباد(ڈیلی اردو) خیبرپختونخوا اور بلوچستان کے مختلف علاقوں میں سیکیورٹی فورسز کی کارروائیوں کے دوران مجموعی طور پر 5 مبینہ دہشتگرد ہلاک ہوگئے، جبکہ کارروائیوں میں اسلحہ اور گولہ بارود بھی برآمد کیے جانے کا دعویٰ کیا گیا ہے۔

ٹانک میں دہشتگردوں کی جانب سے سرکاری پٹوارخانے کو نشانہ بنانے کی مبینہ کوشش سیکیورٹی فورسز نے ناکام بنا دی۔ ذرائع کے مطابق خودکش حملہ آور پٹوارخانے تک پہنچنے سے قبل ہی دھماکا خیز مواد پھٹنے کے نتیجے میں ہلاک ہوگیا۔ دھماکے سے قریبی دو مکانات کو نقصان پہنچا اور بعض دیواریں بھی منہدم ہوئیں، جس کے بعد سیکیورٹی فورسز نے علاقے کو گھیرے میں لے کر سرچ آپریشن شروع کردیا۔

شمالی وزیرستان میں بھی سیکیورٹی فورسز نے کارروائی کی، جس کے نتیجے میں 3 مبینہ دہشتگرد ہلاک ہوئے۔ کارروائی کے بعد ان کے ٹھکانے تباہ کرنے کے ساتھ وہاں سے اسلحہ اور گولہ بارود برآمد کیے جانے کی اطلاعات ہیں۔

بلوچستان کے ضلع سوراب میں سیکیورٹی فورسز کی ایک اور کارروائی میں ایک مبینہ دہشتگرد ہلاک ہوا۔ ذرائع کے مطابق کارروائی کے دوران اسلحہ اور گولہ بارود بھی قبضے میں لیا گیا۔

ذرائع کے مطابق خیبرپختونخوا اور بلوچستان میں ہونے والی ان مختلف کارروائیوں میں مجموعی طور پر 5 مبینہ دہشتگرد ہلاک ہوئے۔ سیکیورٹی فورسز نے علاقوں میں سرچ اور کلیئرنس کارروائیاں جاری رکھنے کا بتایا ہے۔

صدر مملکت نے کارروائیوں میں کامیابی پر سیکیورٹی فورسز کو خراج تحسین پیش کرتے ہوئے دہشتگردی کے خلاف ان کی خدمات اور قربانیوں کو سراہا ہے۔