خیبرپختونخوا میں باجوڑ اور خیبر اضلاع میں بڑے پیمانے پر فوجی آپریشن کا آغاز

پشاور (ڈیلی اردو) پاکستان کے شورش زدہ صوبے خیبرپختونخوا کے حکومت نے قبائلی ضلع باجوڑ اور خیبر میں شدت پسندوں کے خلاف بڑے پیمانے پر آپریشن شروع کر دیا ہے۔ 

سرکاری ذرائع کے مطابق، باجوڑ میں مقامی عمائدین اور شدت پسندوں کے درمیان امن جرگہ ناکام ہونے کے بعد یہ کارروائی عمل میں لائی گئی۔ 

ذرائع نے علاقے میں تقریباً 800 دہشتگردوں کی موجودگی کی تصدیق کی ہے۔

اطلاعات کے مطابق، جرگے نے شدت پسندوں سے علاقہ چھوڑنے سمیت تین اہم مطالبات کیے تھے، تاہم کالعدم تحریک طالبان پاکستان (ٹی ٹی پی) نے علاقہ خالی کرنے سے انکار کر دیا۔ 

باجوڑ کی تحصیل ماموند کے دو علاقوں میں تقریباً 300 دہشتگرد موجود ہیں جبکہ خیبر میں 350 سے زائد شدت پسند سرگرم ہیں، جن میں سے 80 فیصد افغان باشندے ہیں۔

ماموند کی آبادی 3 لاکھ سے زیادہ ہے، جبکہ اب تک 40 ہزار سے زائد افراد گھربار چھوڑ کر نقل مکانی کر چکے ہیں۔ 

کمشنر ملاکنڈ ڈویژن عابد وزیر کے مطابق، متاثرین کے لیے رہائش کا انتظام مکمل کر لیا گیا ہے۔ خار میں 107 سرکاری عمارتوں میں بے گھر افراد کو ٹھہرایا جا رہا ہے اور خار اسپورٹس کمپلیکس میں خیمہ بستی قائم کی جا رہی ہے۔

قبل ازیں، صوبائی وزارت داخلہ نے نوٹیفکیشن جاری کرتے ہوئے اعلان کیا تھا کہ تین روزہ آپریشن کے دوران 11 اگست صبح 11 بجے سے 14 اگست صبح 11 بجے تک باجوڑ کے متعدد علاقوں میں مکمل کرفیو نافذ رہے گا۔ اس دوران عوام کے گھروں سے نکلنے یا سڑکوں پر آنے پر پابندی ہوگی اور خلاف ورزی کی صورت میں تمام تر ذمہ داری متعلقہ افراد پر عائد ہوگی۔

ذرائع کے مطابق، آپریشن شروع ہونے سے پہلے ہی کئی خاندان محفوظ مقامات کی طرف منتقل ہو گئے تھے، جبکہ دیگر کو سرکاری کیمپس میں منتقل کیا جا رہا ہے۔