خیبرپختونخوا میں سیکیورٹی فورسز کی کارروائیاں، 15 دہشت گرد ہلاک

راولپنڈی (ک م) خیبرپختونخوا کے مختلف اضلاع میں سیکیورٹی فورسز نے تین علیحدہ علیحدہ کارروائیوں کے دوران 15 خارجی دہشت گردوں کو ہلاک کر دیا جبکہ فائرنگ کے تبادلے میں دو جوان ہلاک ہو گئے۔

پاک فوج کے شعبہ تعلقات عامہ (آئی ایس پی آر) کے مطابق یہ کارروائیاں 25 اور 26 اپریل کو خیبرپختونخوا کے مختلف علاقوں میں کی گئیں۔

ترجمان کے مطابق ضلع کرک میں خوارج کی موجودگی کی خفیہ اطلاع پر کارروائی کی گئی، جس میں 8 دہشت گرد ہلاک کر دیے گئے۔
اسی طرح دوسری کارروائی شمالی وزیرستان میں کی گئی جہاں 4 خارجی دہشت گردوں کو ہلاک کیا گیا۔ تاہم اس دوران شدید فائرنگ کے تبادلے میں 28 سالہ لانس نائیک عثمان مہمند اور 26 سالہ سپاہی عمران خان ہلاک ہو گئے۔

تیسری کارروائی جنوبی وزیرستان کے گومل زام کے علاقے میں کی گئی، جہاں 3 مزید خارجی دہشت گردوں کو ہلاک کیا گیا۔

آئی ایس پی آر کے مطابق مارے گئے تمام دہشت گرد مختلف دہشت گردانہ سرگرمیوں میں ملوث تھے اور ان کے قبضے سے اسلحہ اور گولہ بارود بھی برآمد ہوا ہے۔
علاقے میں مزید خوارج کی موجودگی کے پیش نظر سیکیورٹی فورسز کا سینیٹائزیشن آپریشن جاری ہے۔

ترجمان پاک فوج نے کہا کہ پاکستان کی سیکیورٹی فورسز دہشت گردی کے ناسور کو جڑ سے اکھاڑ پھینکنے کے لیے پرعزم ہیں، اور بہادر سپاہیوں کی یہ قربانیاں ہمارے عزم کو مزید مضبوط کرتی ہیں۔

واضح رہے کہ پاکستان، کالعدم تحریک طالبان پاکستان (ٹی ٹی پی) سے تعلق رکھنے والے عسکریت پسندوں کے لیے “خوارج” کی اصطلاح استعمال کرتا ہے۔