دہشت گرد حملوں کا خطرہ: بلوچستان میں 31 اگست تک موبائل انٹرنیٹ بند، دفعہ 144 نافذ

کوئٹہ (ڈیلی اردو رپورٹ) پاکستانی سیکیورٹی اداروں کو دہشت گرد حملوں کے خدشات کے پیش نظر بلوچستان بھر میں موبائل انٹرنیٹ سروس 31 اگست تک معطل رکھنے کا فیصلہ کیا گیا ہے، جب کہ صوبے میں دفعہ 144 نافذ کر دی گئی ہے۔

حکام کے مطابق، پابندی کے تحت موٹر سائیکل پر ڈبل سواری، اسلحے کی نمائش، پانچ سے زائد افراد کے اجتماعات اور عوامی مقامات پر چہرہ ڈھانپنے پر بھی پابندی عائد کی گئی ہے۔

کوئٹہ سمیت مختلف علاقوں میں انٹرنیٹ سروس بدھ کی شام سے بند ہے، جس سے طلبہ، مریضوں اور کاروباری حلقوں کو شدید مشکلات کا سامنا ہے۔

جعفر ایکسپریس دہشتگردی سے بال بال بچی

بلوچستان کے شہر سبی میں ریلوے ٹریک پر دھماکا اس وقت ہوا جب پنجاب سے آنے والی جعفر ایکسپریس گزر چکی تھی۔ واقعے میں کوئی جانی نقصان نہیں ہوا۔ سیکیورٹی فورسز نے علاقے کو گھیرے میں لے کر سرچ آپریشن شروع کر دیا ہے۔

پولیس حکام کے مطابق جائے وقوعہ سے شواہد اکھٹے کیے جا رہے ہیں، جب کہ بم دھماکے کی نوعیت اور ہدف کے حوالے سے تحقیقات جاری ہیں۔

یہ واقعہ پیر کے روز جعفر ایکسپریس پر ہونے والے حملے کے بعد پیش آیا ہے۔ پیر کی صبح کوئٹہ سے پشاور جانے والی اسی ٹرین کے پائلٹ انجن کو کولپور کے قریب فائرنگ کا نشانہ بنایا گیا تھا، جس کے باعث انجن کو پانچ گولیاں لگیں، تاہم عملہ محفوظ رہا۔

اس حملے کی ذمہ داری علیحدگی پسند تنظیم بلوچ لبریشن آرمی (بی ایل اے) نے قبول کی تھی۔ جعفر ایکسپریس ماضی میں بھی کئی بار دہشتگردی کا نشانہ بن چکی ہے۔

مارچ 2025 میں کوئٹہ سے پشاور جانے والی جعفر ایکسپریس پر حملے میں 26 مسافر ہلاک ہوئے تھے جن میں اکثریت سیکیورٹی اہلکاروں کی تھی، جب کہ جون 2025 میں جیکب آباد میں بم دھماکے کے باعث ٹرین کی چار بوگیاں پٹڑی سے اتر گئی تھیں، تاہم تمام مسافر محفوظ رہے تھے۔

تمپ میں دہشتگرد حملے کی کوشش ناکام

ضلع کیچ کی تحصیل تمپ میں سیکیورٹی فورسز نے دہشتگردوں کے حملے کی کوشش ناکام بنا دی ہے۔ ذرائع کے مطابق، کالعدم بلوچ لبریشن فرنٹ (بی ایل ایف) کے دھازن گروپ سے تعلق رکھنے والے چار دہشتگردوں نے فورسز پر حملہ کیا، جس پر فورسز نے بروقت کارروائی کرتے ہوئے "جبار عرف چند" نامی دہشتگرد کو ہلاک جبکہ دوسرے کو زخمی کر دیا۔

واقعے کے بعد جائے وقوعہ سے پستول، آئی ای ڈی ڈیٹونیٹر اور بی ایل اے کے جھنڈے برآمد کیے گئے۔

تحصیل تمپ، تربت کا ذیلی علاقہ ہے جو بلوچستان کے سرحدی ضلع کیچ میں واقع ہے اور ایران کے ساتھ سرحد رکھتا ہے۔ سیکیورٹی ذرائع کے مطابق، یہ علاقہ شدت پسند تنظیموں کے لیے گزرگاہ کے طور پر استعمال ہوتا رہا ہے۔