دہشتگرد تھرمل ویپن سائٹ استعمال کر رہے ہیں، آئی جی معظم جاہ انصاری کا انکشاف

پشاور (ڈیلی اردو) انسپکٹر جنرل آف پولیس ( آئی جی) خیبرپختونخوا معظم جاہ انصاری نے انکشاف کیا ہے کہ صوبے میں حالیہ دنوں میں دہشت گردوں نے تھرمل ویپن سائٹ کا استعمال کیا۔

آئی جی کے پی معظم جاہ انصاری کا کہنا ہے کہ مردان، بنوں، لکی مروت اور ٹانک میں کچھ کارروائیوں میں تھرمل ویپن سائٹ استعمال ہوئے، خدشہ ہے تھرمل ویپن سائٹ ٹیکنالوجی افغانستان سے لائی گئی ہے۔

آئی جی نے مزید کہا کہ ممکن ہے یہ ہتھیار نیٹو فورسز کے جانے کے بعد دہشت گردوں اور ٹی ٹی پی کے ہاتھ لگے ہوں۔

انہوں نے کہا کہ خیبر پختونخوا پولیس کو رواں ہفتے تھرمل ویپن سائٹ فراہم کریں گے، افغانستان میں بارڈر کے قریب کچھ جگہوں پر افغان حکومتی رٹ نہیں ہے۔