دیر بالا میں پاکستانی طالبان کے خلاف ٹارگٹڈ آپریشن، کمانڈر سمیت 9 دہشتگرد ہلاک

واشنگٹن (ش  ح ط) پاکستان کے شورش زدہ صوبے خیبر پختونخوا کے ضلع دیر بالا کے مختلف علاقوں میں پولیس اور محکمہ انسداد دہشتگردی (سی ٹی ڈی) نے فتنہ الخوارج کے خلاف تین روزہ ٹارگٹڈ آپریشن کیا، جس کے دوران 9 دہشتگرد ہلاک اور 5 کی لاشیں برآمد ہوئیں۔

پاکستان میں کالعدم تحریک طالبان پاکستان (ٹی ٹی پی) سے تعلق رکھنے والے عسکریت پسندوں کے لیے خوارج کی اصطلاح استعمال کی جاتی ہے۔ اسی تناظر میں دیر بالا کے دوبندو، بیکارے، سلام کوٹ، ہاتن درہ اور ملحقہ علاقوں میں کارروائیاں کی گئیں۔ آپریشن مصدقہ اطلاعات کی بنیاد پر کیا گیا اور اس میں کالعدم تنظیموں کے عناصر کو نشانہ بنایا گیا۔

آپریشن کے دوران البرق کمانڈوز، ایلیٹ فورس، آر آر ایف یونٹ، بم ڈسپوزل اسکواڈ اور ڈی ایس بی اسٹاف نے پیشہ ورانہ مہارت سے حصہ لیا۔ جدید ہتھیاروں، اے پی سیز، تھرمل آلات اور ڈرون کیمروں کے ذریعے دہشت گردوں اور سہولت کاروں کے خلاف کارروائی کی گئی۔

پہلے روز 5 دہشتگرد ہلاک اور 2 کی لاشیں برآمد ہوئیں، فائرنگ کے تبادلے میں پولیس کے 7 جوان زخمی اور 2 مقامی شہری ہلاک ہوئے۔ مجموعی طور پر 3 دن کے آپریشن میں 9 دہشتگرد ہلاک، 5 کی لاشیں برآمد اور 10 پولیس جوان زخمی ہوچکے ہیں، جس میں مقامی کمانڈر ساجد بھی شامل ہے۔

ڈی پی او دیر بالا سید محمد بلال نے کہا کہ یہ جراتمندانہ کارروائی نہ صرف دہشت گردوں کو منہ توڑ جواب ہے بلکہ دیر میں دیرپا امن کے قیام کی جانب ایک اہم قدم بھی ہے۔ انہوں نے یقین دلایا کہ دیر پولیس فتنہ الخوارج کے مکمل خاتمے تک ہر قسم کی قربانی دینے کے لیے تیار ہے۔