راولپنڈی اور اسلام آباد میں دہشتگردی کا بڑا منصوبہ ناکام، ٹی ٹی پی کے 2 انتہائی مطلوب دہشتگرد گرفتار

اسلام آباد (ڈیلی اردو) کاؤنٹر ٹیررازم ڈپارٹمنٹ (سی ٹی ڈی) نے جڑواں شہروں راولپنڈی اور اسلام آباد میں دہشتگردی کا بڑا منصوبہ ناکام بنا دیا۔

سی ٹی ڈی پنجاب کے مطابق حساس ادارے کے ساتھ مل کر راولپنڈی میں مشترکہ کارروائی کر کے کالعدم تحریک طالبان پاکستان (ٹی ٹی پی) کے 2 انتہائی مطلوب دہشتگردوں کو گرفتار کیا گیا۔

https://twitter.com/ShabbirTuri/status/1623659732396552192?t=Mkdr4YM3vQ29cGMRySg-Lg&s=19

سی ٹی ڈی پنجاب نے دہشتگردوں کی شناخت حیات اللہ اور وکیل خان کے نام سے کی ہے۔

دہشتگردوں نے انکشاف کیا کہ انہوں نے راولپنڈی پولیس لائنز پر حملہ آور ہونا تھا۔

تھانہ صدر بیرونی اور ڈسٹرکٹ کورٹس راولپنڈی دہشتگردوں کا ٹارگٹ تھے، سینٹ پال چرچ بھی حاجی فقیر گروپ کا ٹارگٹ تھا۔

کانونٹ اسکول راولپنڈی، پولیس لائنز اسلام آباد میں تخریبی کارروائی ہونا تھی۔

دہشتگردوں نے انکشاف کیا کہ تمام مقامات کی ریکی کرکے تصاویر ٹی ٹی پی کمانڈرکو بھجوائی گئیں۔

سی ٹی ڈی پنجاب کا کہنا ہے کہ حاجی فقیر گروپ افغانستان سے آپریٹ کررہا ہے، ملزمان کے خلاف مقدمہ درج کرکے مزید تفتیش کی جاری ہے۔