راولپنڈی: ہولی فیملی ہسپتال کی پارکنگ میں کھڑی گاڑی سے سینئر صحافی کی تشدد زدہ لاش برآمد

راولپنڈی (ڈیلی اردو) راولپنڈی کے علاقے تھانہ نیو ٹاؤن کی حدود میں واقع ہولی فیملی ہسپتال کی پارکنگ میں کھڑی گاڑی سے سینیئر صحافی کی تشدد زدہ لاش برآمد  ہوئی ہے۔

پولیس کے مطابق برآمد ہونے والی لاش کی شناخت شفاعت علی شیخ کے نام سے ہوئی ہے۔ ذرائع نے بتایا کہ مذکورہ صحافی کی بیٹی ہولی فیملی ہسپتال میں داخل تھی اور وہ پارکنگ ایریا  میں کھڑی اپنی گاڑی سے مختلف اخبارات کو اپنی بیٹ یعنی جرائم سے متعلق خبریں اپنے لیپ ٹاپ پر بنا کر بھیجتا تھا۔

ذرائع نے یہ بھی دعویٰ کیا ہے کہ صحافی بیٹی کی علالت کی وجہ سے پریشان تھا۔ پولیس نے دعویٰ کیا ہے کہ مقتول کے جسم پر تشدد کے نشانات بھی موجود ہیں اور لاش 2  سے 3 روز پرانی ہے۔ پولیس کے مطابق ہسپتال کے مرکزی دروازے پر تعینات سیکیورٹی گارڈ سے بھی پوچھ گچھ جاری ہے۔ ہسپتال میں لگے سی سی ٹی وی کیمروں سے مدد بھی حاصل کی جارہی ہے۔