رحیم یارخان: پولیس چوکی پر راکٹ حملہ، 5 اہلکار ہلاک، 2 زخمی

رحیم یارخان (ڈیلی اردو) ضلع رحیم یارخان کے علاقے میں واقع شیخانی پولیس چوکی پر خوفناک حملے میں پانچ پولیس اہلکار ہلاک جبکہ دو زخمی ہو گئے۔ پولیس کے مطابق یہ حملہ مبینہ طور پر اندھڑ گینگ اور بکھرانی گینگ کے مسلح ڈاکوؤں نے کیا، جنہوں نے راکٹ لانچر اور ہینڈ گرنیڈ سمیت بھاری ہتھیاروں کا استعمال کیا۔

پولیس ترجمان کا کہنا ہے کہ حملے کے وقت چوکی پر سات اہلکار ڈیوٹی پر موجود تھے، جن میں سے پانچ موقع پر ہی ہلاک ہو گئے۔ ہلاک ہونے والے اہلکاروں کی شناخت عرفان، سلیم، خلیل، غضنفر اور نخیل کے ناموں سے ہوئی ہے، جن میں تین کا تعلق بہاولنگر اور دو کا رحیم یارخان سے ہے۔

پولیس نے لاشوں کو شیخ زید اسپتال منتقل کر دیا ہے جبکہ زخمی اہلکاروں کو طبی امداد فراہم کی جا رہی ہے۔ واقعے کے بعد علاقے میں سیکیورٹی ہائی الرٹ کر دی گئی ہے اور حملہ آوروں کی تلاش کے لیے سرچ آپریشن کا آغاز کر دیا گیا ہے۔

پولیس حکام کے مطابق یہ واقعہ ریاستی رٹ کو چیلنج کرنے کے مترادف ہے اور مجرموں کو جلد قانون کے کٹہرے میں لایا جائے گا۔