روس نے ہلاک ہونے والے 528 یوکرینی فوجیوں کی باقیات واپس کر دیں

کییف (ڈیلی اردو) یوکرینی حکام نے ہفتے کے روز بتایا ہے کہ روس کی جانب سے ایک مرتبہ پھر یوکرین کے سینکڑوں ہلاک ہونے والے فوجیوں کی میتیں واپس کی گئی ہیں۔

یوکرین کے دفتر برائے جنگی قیدی امور کے مطابق روسی فریق کی جانب سے 528 افراد کی باقیات کییف کے حوالے کی گئیں، جن کے بارے میں کہا جا رہا ہے کہ وہ یوکرینی فوجی ہو سکتے ہیں۔ 

اس عمل میں بین الاقوامی ریڈ کراس کمیٹی نے ثالثی کا کردار ادا کیا۔

روس کی جانب سے اس حوالے سے فوری طور پر کوئی باضابطہ تصدیق سامنے نہیں آئی، تاہم روسی سرکاری خبر ایجنسی نے ایک روز قبل رپورٹ کیا تھا کہ ہلاک شدہ فوجیوں کے تبادلے کا عمل بھی طے پایا ہے۔ اس رپورٹ کے مطابق ماسکو 526 یوکرینی فوجیوں کی لاشیں واپس کرے گا جبکہ 41 روسی لاشیں وصول کرے گا۔

گزشتہ برسوں میں ہونے والے ایسے تبادلوں میں یوکرین کے ہلاک شدگان کی تعداد عموماً زیادہ رہی ہے۔ مبصرین کے مطابق اس کی ایک بڑی وجہ یہ ہے کہ روسی فوج کی پیش قدمی کے باعث یوکرینی افواج اکثر پسپائی کے دوران اپنے ہلاک شدگان کی لاشیں واپس حاصل نہیں کر پاتیں۔

اسی دوران ماسکو اور کییف کے درمیان ایک بڑے پیمانے پر قیدیوں کا تبادلہ بھی شروع ہوا، جس میں مجموعی طور پر ایک ہزار جنگی قیدیوں کی رہائی شامل ہے۔ 

یہ پیش رفت امریکی صدر ڈونلڈ ٹرمپ کی ثالثی سے طے پانے والی اس جنگ بندی سمجھوتے کا حصہ ہے جو نو سے 11 مئی تک نافذ رہی اور جس کا مقصد روس کے یومِ فتح کی فوجی پریڈ کے دوران سکیورٹی کو یقینی بنانا تھا۔

روس گزشتہ چار سال سے یوکرین کے خلاف مکمل جنگ جاری رکھے ہوئے ہے۔