روس نے یوکرین پر تباہ کن حملہ کر دیا، 656 ڈرون اور 73 میزائل داغ دیے

ماسکو/کییف (ڈیلی اردو)  روس  نے پیر اور منگل کی درمیانی رات یوکرین کے کئی شہروں پر، جن میں کییف، دنیپرو اور خارکیف شامل ہیں، میزائلوں اور جنگی ڈرونز کے ساتھ بڑا حملہ کیا، جس کے نتیجے میں کم از کم 21 افراد ہلاک اور 100 سے زائد زخمی ہو گئے۔

یوکرین کے صدر وولودیمیر زیلنسکی کئی دنوں سے خبردار کر رہے تھے کہ روس ایک بڑے حملے کی تیاری کر رہا ہے۔ دوسری جانب ماسکو نے تصدیق کی کہ اس نے ایک ’’وسیع پیمانے پر حملہ‘‘ کیا ہے۔

یوکرینی فضائیہ کے مطابق روس نے پیر کی شام مقامی وقت کے مطابق چھ بجے سے حملے کرنا شروع کیے اور مجموعی طور پر 73 میزائل اور 656 ڈرونز یوکرین کی جانب فائر کیے گئے۔

یوکرینی فضائیہ نے بتایا کہ ان میں سے 40 میزائل اور 602 ڈرونز فضا میں ہی تباہ یا ناکارہ بنا دیے گئے۔

یوکرینی فضائیہ کے ٹیلیگرام پر جاری کردہ ایک بیان کے مطابق دارالحکومت کییف اس حملے کا مرکزی ہدف تھا، تاہم ڈرون حملے ملک بھر میں 38 دیگر مقامات پر بھی کیے گئے۔ 

دوسری جانب روسی وزارت دفاع نے کہا کہ اس نے یوکرین کی دفاعی صنعت سے متعلق تنصیبات کو ’’دور مار اور انتہائی درست‘‘ ہتھیاروں سے نشانہ بنایا۔

روسی وزارت دفاع کے ایک بیان کے مطابق، ’’اس حملے کے تمام مقاصد حاصل کر لیے گئے اور تمام 

مقررہ اہداف کو کامیابی سے نشانہ بنایا گیا ۔‘‘

یوکرینی فضائیہ نے بتایا کہ روس نے ان حملوں میں بیلسٹک اور کروز میزائل استعمال کیے، جو ماضی میں بھی روسی حملوں کا حصہ رہے ہیں۔