روس کا یوکرین پر ڈرونز اور میزائلوں سے حملہ، سات افراد ہلاک

کییف (ڈیلی اردو) یوکرینی حکام کے مطابق، روس نے ہفتے کی شب یوکرین پر ڈرونز اور میزائلوں سے بڑے حملے کیے، جس کے نتیجے میں انفراسٹرکچر کو نقصان پہنچا اور شمال مشرقی شہر خارکیف میں دو بچوں سمیت کم از کم سات افراد ہلاک ہو گئے۔

یوکرینی صدر وولودیمیر زیلنسکی نے بتایا کہ روس نے ملک بھر میں توانائی کے شعبے اور ریلوے کے ڈھانچے کو نشانہ بناتے ہوئے 480  ڈرونز اور 29 میزائل داغے۔

زیلنسکی نے ٹیلی گرام ایپ پر لکھا، ’’پارٹنر ممالک کی جانب سے زندگی کے خلاف ان وحشیانہ حملوں کا بھرپور جواب ملنا چاہیے۔‘‘ انہوں نے مزید کہا، ’’روس نے یوکرین کے رہائشی اور اہم انفراسٹرکچر کو تباہ کرنے کی کوششیں ترک نہیں کی ہیں، اس لیے یوکرین کے لیے مدد کا سلسلہ جاری رہنا چاہیے۔‘‘ انہوں نے شراکت داروں سے فضائی دفاعی نظام اور ہتھیاروں کی فراہمی جاری رکھنے کا مطالبہ کیا۔

یوکرینی فضائیہ کا کہنا ہے کہ دفاعی یونٹس نے 453 ڈرونز اور 19 میزائل مار گرائے۔ تاہم، نو میزائل اور 26 ڈرونز 22 مقامات پر لگے۔

خارکیف کے علاقائی گورنر اولیہ سنیہوبوف نے بتایا کہ شہر کو روسی ڈرونز اور میزائلوں، دونوں سے نشانہ بنایا گیا۔ ایک روسی بیلسٹک میزائل پانچ منزلہ رہائشی عمارت سے ٹکرانے کے باعث دو بچوں سمیت سات افراد اپنی جان سے ہاتھ دھو بیٹھے۔

سنیہوبوف کے مطابق، خارکیف میں 15 افراد زخمی بھی ہوئے اور روسی حملوں سے 19 رہائشی عمارتیں تباہ ہوئیں۔ انہوں نے بتایا کہ تجارتی اور انتظامی عمارتوں، بجلی کی تقسیم کی لائنوں اور گاڑیوں کو بھی نشانہ بنایا گیا۔

قومی گرڈ آپریٹر یوکرینرگو نے بتایا کہ روسی حملوں کے بعد ملک کے سات علاقوں میں ہنگامی طور پر بجلی کی کٹوتی کر دی گئی ہے۔ یوکرینی حکام نے یہ بھی بتایا کہ روس نے وسطی یوکرین میں چار ریلوے اسٹیشنوں اور دیگر انفراسٹرکچر کے ساتھ ساتھ جنوبی اودیسا کے علاقے میں بندرگاہ کو بھی نشانہ بنایا، جس سے خوردنی تیل کے کنٹینرز میں آگ لگ گئی اور اناج کے گودام کو نقصان پہنچا۔