روسی صدر پوٹن نے جوہری تجربات کی تیاری کیلئے تجاویز طلب کر لیں

ماسکو (ڈیلی اردو/اے پی، ڈی پی اے، اے ایف پی، روئٹرز) روسی صدر ولادیمیر پوٹن کی جانب سے یہ ہدایت اپنے امریکی ہم منصب ڈونلڈ ٹرمپ کے جوہری تجربات کی بحالی کے بیان کے بعد دی گئی ہے۔ روسی وزیر دفاع نے صدر پوٹن کو ’فوری طور اور مکمل پیمانے پر‘ جوہری تجربات کی تیاری کا مشورہ دیا ہے۔

روسی صدر ولادیمیر پوٹن نے  آج پانچ نومبر بروز بدھ اعلیٰ حکام کو ہدایت دی کہ وہ جوہری ہتھیاروں کے ممکنہ تجربات کے لیے تجاویز تیار کریں۔ ان کی جانب سے یہ ہدایت امریکی صدر ڈونلڈ ٹرمپ کے اس اعلان کے بعد سامنے آئی ہے کہ امریکہ دوبارہ جوہری تجربات شروع کرے گا۔

پوٹن نے کہا کہ روس نے ہمیشہ جوہری تجربات پر پابندی کے جامع  معاہدے (CTBT) کی مکمل پاسداری کی ہے، تاہم اگر امریکہ یا کوئی اور جوہری طاقت کوئی نیا جوہری تجربہ کرتی ہے تو روس بھی ایسا ہی کرے گا۔

روسی وزیر دفاع آندرے بیلوسوف نے صدر پوٹن کو بتایا کہ امریکہ کے حالیہ بیانات اور اقدامات کے پیش نظر ’’فوری طور اور مکمل پیمانے پر جوہری تجربات کی تیاری‘‘ مناسب ہو گی۔

بیلوسوف کے مطابق روس کی آرکٹک ٹیسٹنگ سائٹ نَوایا زِملیا ایسے تجربات مختصر نوٹس پر کر سکتی ہے۔

صدر پوٹن نے کہا، ’’میں وزارت خارجہ، وزارت دفاع، خفیہ اداروں اور متعلقہ سول ایجنسیوں کو ہدایت دیتا ہوں کہ وہ اس معاملے پر مزید معلومات جمع کریں، انہیں روسی سلامتی کونسل میں تجزیے کے لیے پیش کریں اور جوہری تجربات کی تیاری کے ممکنہ آغاز پر مشترکہ تجاویز دیں۔‘‘

امریکہ نے آخری بار 1992 میں جوہری تجربہ کیا تھا، چین اور فرانس نے 1996 میں، جب کہ سوویت یونین نے 1990 میں۔ سوویت یونین کے خاتمے کے بعد روس نے آج تک کوئی جوہری تجربہ نہیں کیا۔