روسی فوجی کی اپنے ہی ساتھیوں پر فائرنگ، 2 افسران سمیت 8 فوجی ہلاک

ماسکو (ڈیلی اردو/نیوز ایجنسی) روسی فوجی نے اپنے ہی ساتھیوں پر اندھادھند فائرنگ کرکے دو افسران سمیت 8 فوجیوں کو ہلاک جبکہ 2 کو زخمی کردیا۔

غیر ملکی میڈیا کے مطابق فائرنگ کا واقعہ روسی شہر چیتا کے مضامفات میں واقع گورنی گاؤں میں قائم فوجی چھاؤنی میں مقامی وقت کے مطابق شام 6 بجکر 15 منٹ پر پیش آیا۔ روسی فوجی رامیل شمسدینو نے ذہنی دباؤ اور گھریلو مسائل کی وجہ سے اپنے ہی ساتھیوں پر فائرنگ کردی جس کے نتیجے میں دو افسران سمیت 8 فوجیوں کو ہلاک جب کہ دو شدید زخمی ہوگئے۔

ہلاک اور زخمی ہونے والوں کو قریبی فوجی ہسپتال منتقل کردیا گیا ہے جب کہ حملہ آور اہلکار کو حراست میں لےکر تحقیقات کا آغاز کردیا گیا ہے۔

واقعہ کی تحقیقات کیلئےنائب وزیردفاع کی سربراہی میں اعلیٰ تحقیقاتی کمیشن قائم کیا گیا ہے، روسی وزارت دفاع کا کہنا ہے کہ ہلاک ہونے والوں میں دو آفیسر بھی شامل ہیں۔