روس۔یوکرین جنگ کو چار سال مکمل

کییف (ڈیلی اردو ) روس کی جانب سے یوکرین پر فوجی حملے کو چار سال مکمل ہونے پر یوکرین کے صدر وولودیمیر زیلنسکی نے عہد کیا ہے کہ یوکرینی عوام کی قربانیاں صرف روس کے ساتھ کسی بھی قیمت پر امن کے لیے ضائع نہیں کی جائیں گی۔

دارالحکومت کییف میں منعقدہ تقریب سے خطاب کرتے ہوئے انہوں نے کہا، ’’پوٹن اپنے مقاصد حاصل نہیں کر سکے۔ وہ یوکرینی عوام کو توڑ نہیں سکے اور وہ یہ جنگ نہیں جیت سکے۔‘‘

جنگ کی چوتھی برسی ایسے وقت میں آئی ہے جب یوکرین کے اہم مغربی اتحادیوں کے درمیان اختلافات بھی سامنے آ رہے ہیں۔ یورپی ممالک روس کے خلاف پابندیوں کے نئے پیکج اور یوکرین کے لیے نوّے ارب یورو کے قرض پر اتفاق کرنا چاہتے تھے، تاہم ہنگری نے ان اقدامات پر اپنا اعتراض برقرار رکھا۔

ہنگری اور اس کا ہمسایہ ملک سلوواکیہ یوکرین پر الزام عائد کرتے ہیں کہ وہ دروژبا پائپ لائن کے ذریعے روسی تیل کی ترسیل جان بوجھ کر روک رہا ہے، جبکہ یوکرین کا کہنا ہے کہ حالیہ روسی حملوں سے ہونے والے نقصان کے بعد پائپ لائن کی مرمت کی کوششیں جاری ہیں۔

چوبیس فروری دو ہزار بائیس کو شروع ہونے والی یہ جنگ دوسری عالمی جنگ کے بعد یورپ کا سب سے خونریز تنازع قرار دی جا رہی ہے۔ اندازوں کے مطابق دونوں جانب کے لاکھوں فوجی ہلاک یا زخمی ہو چکے ہیں، جبکہ ہزاروں یوکرینی شہری بھی ہلاک ہوئے اور میزائل و ڈرون حملوں میں متعدد شہر تباہ ہو گئے۔

جنگ کے خاتمے کے لیے امریکہ کی ثالثی میں جاری سفارتی کوششیں تاحال علاقائی معاملات اور سیکیورٹی ضمانتوں پر تعطل کا شکار ہیں۔

صدر زیلنسکی نے امریکی صدر ڈونلڈ ٹرمپ کو کییف آنے کی دعوت دیتے ہوئے کہا کہ زمینی حقائق خود دیکھنے کے بعد ہی اس جنگ کی نوعیت اور یوکرینی عوام کی جدوجہد کو پوری طرح سمجھا جا سکتا ہے۔