ریاض میں پاکستان، سعودی عرب اور ترکیہ کے فوجی سربراہان کی اہم ملاقات

ریاض (ڈیلی اردو) پاکستان، سعودی عرب اور ترکیہ کے فوجی سربراہان نے ریاض میں اہم ملاقات کے دوران باہمی دفاعی تعاون، انٹیلی جنس معلومات کے تبادلے، فوجی رابطہ کاری اور دفاعی صلاحیتوں میں ہم آہنگی بڑھانے پر تبادلہ خیال کیا۔ یہ ملاقات تینوں ممالک کے درمیان مکہ مشترکہ دفاعی معاہدے کے تحت تعاون کو عملی شکل دینے کی کوششوں کے تناظر میں ہوئی۔

ملاقات میں پاکستان کے چیف آف ڈیفنس فورسز و چیف آف آرمی اسٹاف فیلڈ مارشل سید عاصم منیر، سعودی چیف آف جنرل اسٹاف جنرل فیاض بن حامد الرویلی اور ترکیہ کے چیف آف جنرل اسٹاف جنرل سلجوق بایراکتار اوغلو شریک ہوئے۔ سعودی وزارت دفاع اور پاکستانی فوج کے مطابق تینوں عسکری قیادتوں نے دفاعی شعبے میں باہمی تعاون اور مشترکہ رابطہ کاری کو مزید مؤثر بنانے کے امور کا جائزہ لیا۔

یہ اجلاس ایسے وقت میں ہوا جب خطے میں کشیدگی میں اضافہ اور سعودی عرب پر حوثی باغیوں کے حملوں کا سلسلہ جاری ہے۔ اس سے ایک روز قبل نیویارک میں پاکستان، سعودی عرب اور ترکیہ کے وزرائے خارجہ نے مکہ مشترکہ دفاعی معاہدے کے تحت تینوں ممالک کے فوجی سربراہان کی ملاقات کے انتظامات اور سعودی عرب کی معاونت کے مختلف امکانات پر بات کی تھی۔

مکہ مشترکہ دفاعی معاہدہ 7 اگست 2026 کو پاکستان، سعودی عرب اور ترکیہ کے درمیان طے پایا تھا۔ معاہدے کے مطابق کسی ایک رکن ملک کے خلاف حملے کو تینوں ممالک کے خلاف حملہ تصور کیا جائے گا۔ معاہدے کا مقصد اجتماعی دفاع، دفاعی تعاون اور رکن ممالک کے درمیان سلامتی کے شعبے میں رابطہ کاری کو مضبوط بنانا ہے۔