ریڈیو پاکستان کی نیوز ریڈر ہما ظفر اور انجینئر محمد اشفاق کورونا وائرس کے باعث انتقال کرگئے

اسلام آباد (ڈیلی اردو/ریڈیو پاکستان) ریڈیو پاکستان کے دو ملازمین آج کورونا وائرس کے باعث انتقال ہوگئے۔

ریڈیو پاکستان کے مطابق سینئر براڈ کاسٹ انجینئر محمد اشفاق اور اردو زبان کی نیوز ریڈر ڈاکٹر ہما ظفر وائرس سے انتقال کرگئے۔ محمد اشفاق ریڈیو پاکستان کے مستقل ملازم تھے اور قابلیت اور فنی مہارت میں بے مثال تھے۔ وہ نہایت مفکر المزاج شخصیت کے مالک تھے۔

ہما ظفر کنٹریکٹ بنیاد پر کام کرنے والے اردو نیوز ریڈر تھیں اور گزشتہ 20 سال سے پاکستان براڈ کاسٹنگ کارپوریشن میں قومی خبریں پڑھ رہی تھیں۔ وہ اعلیٰ تعلیم یافتہ خاتون تھیں، جنہوں نے بیرون ملک سے نفسیات کے مضمون میں پی ایچ ڈی کی۔ وہ وقار النساء گرلز کالج راولپنڈی میں بھی سینئر پروفیسر کے طور پر خدمات انجام دے رہی تھیں۔

اطلاعات و نشریات کے وزیرشبلی فراز، سیکرٹری اطلاعات اکبر حسین درانی، ریڈیو پاکستان کی ڈائریکٹر جنرل امبرین جان، قومی نشریاتی ادارے کے تما م ڈائریکٹرز اور عملے نے ادارے کے دونوں ملازمین کے انتقال پر گہرے دکھ اور افسوس اور سوگوار خاندانوں سے ہمدردی کا اظہار کیا ہے۔

ادھر پاکستان براڈ کاسٹنگ کارپوریشن کی ڈائریکٹر جنرل نے پی بی سی ہیڈکوارٹرز میں ایک اجلاس کے دوران متعلقہ عملے کو تمام شعبوں میں احتیاطی تدابیر پر سختی سے عملدر آمد کی ہدایت کی تاکہ کورونا وائرس کو پھیلنے سے روکا جاسکے۔

کل مورخہ 29.5.2020 بروز جمعۃ المبارک دن ساڑے گیارہ بجے ریڈیو پاکستان ہیڈ کوارٹرز اسلام آباد کے سبزہ زار میں مرحومین کے لئے دعائے مغفرت کا اہتمام کیا گیا۔