سربیا کی اپنے شہریوں کو ایران فوری طور پر چھوڑنے کی ہدایت

تہران (ڈیلی اردو) سربیا کی حکومت نے ایران میں موجود اپنے تمام شہریوں سے کہا ہے کہ وہ فوری طور پر ملک چھوڑ دیں۔

حکام کے مطابق یہ ہدایت بڑھتی ہوئی کشیدگی اور سکیورٹی کی بگڑتی ہوئی صورتحال کے پیش نظر دی گئی ہے۔

یاد رہے کہ اس سے قبل امریکہ، جرمنی، پولینڈ اور بیلجیئم سمیت متعدد یورپی ممالک نے بھی اپنے شہریوں کو فوری طور پر ایران چھوڑنے کا کہا تھا۔

جمعرات کے روز، امریکی صدر نے ایران کو واشنگٹن اور تہران کے درمیان جاری مذاکرات میں ’بامعنی معاہدے‘ تک پہنچنے کے لیے زیادہ سے زیادہ 15 دن کا وقت دیا، اور خبردار کیا کہ بصورت دیگر ایران ’بری چیزوں‘ کا سامنا کرنے کے لیے تیار رہے۔

اسی تناظر میں امریکی اخبار وال اسٹریٹ جرنل نے رپورٹ دی تھی کہ صدر ٹرمپ ایران کے خلاف ’محدود فوجی حملہ‘ کرنے کے امکانات پر غور کر رہے ہیں تاکہ وہ جوہری معاہدے کے حوالے سے امریکی شرائط کو تسلیم کرے۔

اس کے بعد اقوام متحدہ کے سیکرٹری جنرل کو لکھے گئے خط میں ایران نے خبردار کیا کہ وہ کسی بھی ’فوجی جارحیت‘ کا جواب دے گا اور تصادم کی صورت میں خطے میں ’دشمن طاقت‘ سے تعلق رکھنے والے تمام اڈوں، سہولیات اور اثاثوں کو جائز ہدف تصور کرے گا۔