سری نگر: نوگام پولیس اسٹیشن میں دھماکا، 9 افراد ہلاک، 29 زخمی

سری نگر (ڈیلی اردو) بھارت زیرانتظام جموں و کشمیر کے دارالحکومت سری نگر کے نوگام پولیس اسٹیشن کے کمپاؤنڈ میں زوردار دھماکے کے بعد آگ بھڑک اٹھی۔

بھارتی میڈیا کے مطابق یہ دھماکا پولیس اسٹیشن میں ضبط کیے گئے امونیم نائٹریٹ کے پھٹنے کے باعث ہوا۔ واقعے میں اب تک 9 افراد ہلاک جبکہ 29 زخمی ہوگئے ہیں۔

رپورٹس کے مطابق دھماکا اُس وقت ہوا جب پولیس اہلکار اور فارنزک سائنس لیبارٹری (ایف ایس ایل) کی ٹیم سٹیشن کے اندر معائنے میں مصروف تھی۔

دھماکے کے نتیجے میں پولیس اسٹیشن کے احاطے میں کھڑی متعدد گاڑیاں بری طرح متاثر ہوئیں جبکہ فائر ٹینڈرز نے موقع پر پہنچ کر آگ پر قابو پانے کی کوشش کی۔ واقعے کے بعد علاقے کی سڑکوں کو ٹریفک کے لیے بند کردیا گیا۔

پولیس نے دھماکے کی نوعیت اور اصل وجہ جاننے کے لیے تحقیقات شروع کر دی ہیں۔