سعودی عرب: ابھا ایئرپورٹ پر حوثی باغیوں کا ڈرون حملہ، 8 افراد زخمی

ریاض (ڈیلی اردو) سعودی عرب کے سرکاری میڈیا کے مطابق ملک کے جنوبی مغربی علاقے میں واقع ابھا کے ہوائی اڈے کو آج بروز منگل بارودی مواد سے لدے ہوئے ایک ڈرون کے ذریعے نشانہ بنایا گیا۔ اس ڈرون حملے کے نتیجے میں آٹھ افراد زخمی ہوئے اور ایک سویلین ہوائی جہاز کو نقصان پہنچا۔

سعودی عرب کی سرکاری میڈیا کے مطابق گزشتہ چوبیس گھنٹوں میں ابھا ایئر پورٹ پر یہ دوسرا حملہ ہے۔ پہلے حملے میں کوئی جانی یا مالی نقصان نہیں ہوا تھا۔

یمن میں ایران کے حمایت یافتہ حوثی باغیوں کے خلاف سعودی عرب کی سربراہی میں برسرپیکار عسکری اتحاد کی جانب سے اس حملے کی تفصیلات نہیں بتائی گئیں۔ تاہم یہ کہا گیا کہ اس مسلح ڈرون کو فضا میں ہی تباہ کردیا گیا۔

ادھر سوشل میڈیا پر وائرل ہونے والی تصاویر میں دیکھا جا سکتا ہے کہ ایئرپورٹ پر کم از کم دو ڈرونز سے حملہ کیا گیا تھا جس میں طیارے کو بھی نقصان پہنچا اور مسافر بھی زخمی حالت میں نظر آرہے ہیں۔

https://twitter.com/ShabbirTuri/status/1432718390230147073?s=19

اس حملے کی ذمہ داری ابھی تک کسی نے قبول نہیں کی۔