سعودی وزیر مملکت کی وزیراعظم سے ملاقات، خطے میں امن و استحکام پر زور

اسلام آباد (ڈیلی اردو) سعودی عرب کے وزیر مملکت برائے خارجہ امور عادل الجبیر نے جمعے کے روز وزیراعظم پاکستان شہباز شریف سے اسلام آباد میں ملاقات کی، جس میں باہمی تعلقات، خطے کی سلامتی اور پاک-بھارت کشیدگی جیسے اہم امور پر گفتگو ہوئی۔

سعودی وزیر نے اس موقع پر جنوبی ایشیا میں جاری تناؤ پر تشویش کا اظہار کرتے ہوئے پاکستان اور بھارت کے درمیان تمام حل طلب مسائل کو پرامن طریقے سے اور بین الاقوامی اصولوں کے مطابق حل کرنے کی ضرورت پر زور دیا۔

ملاقات کے دوران وزیراعظم نے سعودی عرب کی جانب سے ہر مشکل وقت میں پاکستان کے ساتھ کھڑے ہونے پر شکریہ ادا کیا اور دونوں ممالک کے برادرانہ تعلقات کو مزید مستحکم کرنے کے عزم کا اعادہ کیا۔

اس سے قبل عادل الجبیر نئی دہلی کا دورہ کر چکے تھے، جہاں انہوں نے بھارتی حکام سے ملاقاتیں کیں۔ اسلام آباد میں اپنے دورے کے دوران انہوں نے وزیر خارجہ اسحاق ڈار سے بھی ملاقات کی، جس میں علاقائی و عالمی امور پر تبادلہ خیال کیا گیا۔

وزیراعظم ہاؤس سے جاری بیان کے مطابق، شہباز شریف نے حالیہ بھارتی اقدامات اور سرحد پار حملوں کی شدید الفاظ میں مذمت کرتے ہوئے کہا کہ پاکستان اپنے عوام، خودمختاری اور سرحدوں کے تحفظ کے لیے ہر ممکن اقدام کرے گا، اور اس کا یہ حق اقوام متحدہ کے چارٹر کے تحت حاصل ہے۔

سعودی وزیر مملکت نے امن، برداشت اور بات چیت کے ذریعے مسائل کے حل پر زور دیا اور کہا کہ خطے میں پائیدار امن کے لیے تمام فریقین کو سنجیدہ اقدامات اٹھانے ہوں گے۔