سیستان و بلوچستان میں مبینہ حملوں کی منصوبہ بندی کا الزام، 3 افراد ہلاک، 9 گرفتار

تہران(ڈیلی اردو) ایرانی وزارتِ اطلاعات نے دعویٰ کیا ہے کہ صوبہ سیستان و بلوچستان میں سیکیورٹی فورسز نے مبینہ طور پر حملوں کی تیاری میں مصروف تین گروہوں کے خلاف کارروائی کی، جس کے دوران تین افراد ہلاک اور نو کو گرفتار کر لیا گیا۔

وزارتِ اطلاعات کے مطابق کارروائی صوبے کے جنوبی علاقوں میں کی گئی، جہاں مذکورہ افراد مبینہ طور پر مختلف حملوں کی منصوبہ بندی کر رہے تھے۔ بیان میں کہا گیا ہے کہ سیکیورٹی اہلکاروں اور مسلح افراد کے درمیان فائرنگ کا تبادلہ بھی ہوا۔

ایرانی حکام کا دعویٰ ہے کہ ہلاک اور گرفتار ہونے والے افراد میں سے بعض نے بیرونِ ملک فوجی تربیت حاصل کی تھی، جبکہ انہیں بم بنانے، دھماکوں اور ہدف بنا کر حملے کرنے کی تربیت بھی دی گئی تھی۔ وزارت کے مطابق یہ افراد خفیہ طریقے سے ایران میں داخل ہونے کی کوشش کر رہے تھے۔

وزارتِ اطلاعات نے مزید کہا کہ کارروائی کے دوران گرفتار افراد کے قبضے سے مختلف اقسام کا اسلحہ اور گولہ بارود برآمد کیا گیا۔

ایرانی وزارت کے مطابق ایک الگ کارروائی میں بھی سیستان و بلوچستان سے ہلکے اور نیم بھاری ہتھیاروں کا ذخیرہ برآمد کیا گیا، تاہم بیان میں اس کارروائی سے متعلق مزید تفصیلات فراہم نہیں کی گئیں۔