شام میں روسی فوجیوں سے ہاتھا پائی میں چار امریکی فوجی زخمی

واشنگٹن (ڈیلی اردو/وی او اے) مشرق وسطیٰ کے جنگ زدہ ملک شام میں امریکی فوجیوں کا روسی فوج کے اہل کاروں سے آمنا سامنا ہو گیا۔ اس موقع پر ہونے والے تصادم میں چار امریکی فوجی زخمی ہو گئے۔

Video of US-Russia troops confrontation in Northern #Syria this week. Politico reporting now that 4 US troops were injured as result: pic.twitter.com/zbEgD5jzgc

— Joyce Karam (@Joyce_Karam) August 26, 2020

خبر رساں ادارے ‘رائٹرز’ نے بتایا ہے کہ امریکی فوج کے دو عہدیداروں نے اس واقعہ میں چند اہل کاروں کے زخمی ہونے کی تصدیق کی ہے۔

‘رائٹرز’ کے مطابق بعض موقعوں پر روس اور امریکہ کی فوج کے اہل کاروں کے آمنے سامنے آنے کے واقعات اگرچہ غیر معمولی نہیں ہیں۔ تاہم ان واقعات سے اس خطرے کی نشان دہی ہوتی ہے کہ شام میں دونوں ممالک کی فورسز کس قدر نزدیک رہ کر کارروائیاں کر رہی ہے، جس سے کشیدگی میں مزید اضافے ہو سکتا ہے۔

ایک عہدیدار نے اپنی شناخت ظاہر نہ کرنے کی شرط پر ‘رائٹرز’ کو بتایا کہ اہل کار فائرنگ سے زخمی نہیں ہوئے، بلکہ انہیں روسی اہل کاروں سے ہاتھا پائی کے دوران چوٹیں آئیں۔

دوسرے عہدیدار کا کہنا تھا کہ دونوں ممالک کے فوجی اہل کاروں میں تصادم کا واقعہ رواں ہفتے شمالی مغربی شام میں پیش آیا تھا۔

ان کا دعویٰ تھا کہ زخمی ہونے والے اہل کار اب صحت یاب ہو چکے ہیں۔

شام سے امریکی فوج کا انخلاء روس کو پاوں جمانے کا موقع دے گا۔

پینٹاگان اور خطے میں امریکی فوجی کی سرگومیوں کی نگران سینٹرل کمانڈ نے اس واقعے پر کوئی تبصرہ نہیں کیا۔

امریکی فوج کا کہنا ہے کہ جوائنٹ چیفس آف اسٹاف جنرل مارک ملی نے اپنے روسی ہم منصب سے بدھ کو بات کی ہے۔

تاہم امریکی فوج نے اس گفتگو کی مزید تفصیلات جاری نہیں کیں۔

امریکی فوج عمومی طور پر اہل کاروں کے زخمی ہونے کے بارے میں بیان جاری نہیں کرتی۔ گزشتہ ماہ مشرقی شام میں ایک حادثے میں امریکہ کا ایک پیرا ٹروپر ہلاک ہو گیا تھا۔

واضح رہے کہ امریکہ نے شام میں اپنے فوجیوں کی تعداد میں کمی کر دی ہے۔ اس وقت شمالی شام میں امریکی فوج کے 500 اہل کار موجود ہیں۔