شام میں کرد فورسز کی شکست پر ترکی میں جشن کا سماں

انقرہ (ڈیلی اردو) شامی حکومت نے شمالی مشرقی شہر الرقہ میں واقع العقطان جیل پر مکمل کنٹرول حاصل کرنے کا اعلان کر دیا ہے۔ دوسری جانب ترکی میں اس تازہ ترین پیش رفت پر جشن منایا جا رہا ہے کیوں کہ شام کی نئی حکومت نے ایک اچانک حملے کے ذریعے کرد قیادت والی فورسز کو موثر طور پر شکست دے دی ہے۔

العقطان جیل الرقہ کے شمالی علاقے میں واقع ہے اور وہاں داعش کے متعدد مشتبہ ارکان اور رہنماؤں کو رکھا گیا تھا۔ 2019ء میں داعش کی شکست کے بعد سے یہ جیل ایس ڈی ایف کے زیر انتظام تھی۔ قیدیوں میں یورپی شہریت رکھنے والے داعش کے درجنوں اراکین بھی شامل ہیں۔ یہ تازہ پیش رفت کرد قیادت والی شامی ڈیموکریٹک فورسز (ایس ڈی ایف) کے جنگجوؤں کے انخلاء کے بعد سامنے آئی ہے۔

ریاستی خبر رساں ایجنسی سانا کے مطابق افسران نے قیدیوں کی حالت اور ان کے ریکارڈز کی جانچ شروع کر دی ہے۔

یہ اقدام 18 جنوری کے معاہدے کی پہلے مرحلے کی تکمیل ہے، جس کے تحت وزارت داخلہ جیل کی انتظامی ذمہ داری سنبھالے گی۔ ایس ڈی ایف کے جنگجوؤں کو الرقہ سے محفوظ مقامات، خاص طور پر کوبانی (عین العرب) کی طرف منتقل کیا جا رہا ہے۔

دوسری جانب ترکی میں اس تازہ ترین پیش رفت پر جشن منایا جا رہا ہے۔ انقرہ حکومت کردوں کی قیادت والے مسلح گروپوں کو خطرہ سمجھتی آئی ہے۔ ترکی نے کردستان ورکرز پارٹی (پی کے کے) کے خلاف دہائیوں سے جاری بغاوت کو کچلنے کی کوشش کی، جس میں دسیوں ہزار افراد ہلاک ہو چکے ہیں۔

تجزیہ کاروں کے مطابق شامی ڈیموکریٹک فورسز (ایس ڈی ایف) کا خاتمہ انقرہ کے علاقائی مقاصد کی طرف ایک بڑا قدم ہے۔