شرائط پوری ہونے تک امریکا سے مذاکرات نہیں ہوں گے: محسن رضائی

تہران(ڈیلی اردو) ایرانی قومی سلامتی کونسل کے سیکرٹری محسن رضائی نے کہا ہے کہ جب تک ایران کی جانب سے رکھی گئی شرائط پوری نہیں ہوتیں، امریکا کے ساتھ مذاکرات کا کوئی امکان نہیں۔

محسن رضائی نے امریکی صدر ڈونلڈ ٹرمپ کے مذاکرات سے متعلق مختلف بیانات پر ردعمل دیتے ہوئے انہیں متضاد قرار دیا اور کہا کہ ایرانی عوام کو امریکی بیانات کے بجائے عملی اقدامات کو دیکھنا چاہیے۔

ایرانی عہدیدار کے مطابق واشنگٹن کی جانب سے ایک طرف مذاکرات نہ ہونے کا مؤقف سامنے آتا ہے، جبکہ دوسری جانب ایران کے ساتھ بات چیت کی خواہش کا اظہار کیا جاتا ہے۔ ان کا کہنا تھا کہ تہران صرف عملی اقدامات کی بنیاد پر آئندہ کے لائحہ عمل کا فیصلہ کرے گا۔

آبنائے ہرمز کی صورتحال کا حوالہ دیتے ہوئے محسن رضائی نے کہا کہ موجودہ حالات ماضی جیسے نہیں رہے اور خطے میں پیدا ہونے والی صورتحال کے اثرات کو محض وقتی اقدامات سے ختم نہیں کیا جاسکتا۔

انہوں نے کہا کہ امریکا کو مذاکرات کی راہ ہموار کرنے کے لیے پہلے ایران کی شرائط پوری کرنے کے عملی اقدامات کرنا ہوں گے۔ ان کے مطابق اس کے بعد ہی مذاکرات یا آبنائے ہرمز سے متعلق کسی پیش رفت پر غور کیا جاسکے گا۔