شمالی و جنوبی وزیرستان میں دھماکوں میں 6 افراد ہلاک

واشنگٹن (ش ح ط) پاکستان کے شورش زدہ صوبے خیبر پختونخوا کے قبائلی اضلاع شمالی اور جنوبی وزیرستان میں دو مختلف دھماکوں کے نتیجے میں مجموعی طور پر چھ افراد ہلاک ہو گئے ہیں۔

شمالی وزیرستان کے علاقے شوال، سپین خوڑئی میں ہونے والے واقعے میں کالعدم تحریک طالبان پاکستان (ٹی ٹی پی) کے چار دہشتگرد ہلاک ہو گئے۔ 

سرکاری  ذرائع کے مطابق یہ افراد خودساختہ بارودی مواد (آئی ای ڈی) تیار کر رہے تھے کہ اچانک دھماکہ ہو گیا۔ ہلاک دہشتگردوں میں اہم کمانڈر یار محمد مسلم اور زامد عالم بھی شامل ہیں۔

دوسری جانب جنوبی وزیرستان کی تحصیل اپر سراروغہ کے علاقے وچہ خواڑا میں ایک اور دھماکہ ہوا، جس میں دو افراد ہلاک ہوئے۔ 

ڈپٹی کمشنر عصمت اللہ وزیر کے مطابق یہ دھماکہ نالے میں پڑی بم نما چیز کے پھٹنے سے ہوا، جس کے نتیجے میں بوز اور حجرت اللہ نامی افراد موقع پر ہلاک ہو گئے۔

واقعے کے فوری بعد مقامی انتظامیہ اور سیکیورٹی فورسز نے جائے وقوعہ کا معائنہ کیا اور تحقیقات شروع کر دی ہیں۔ مقامی باشندوں نے علاقے کو بارودی مواد سے پاک کرنے کا مطالبہ بھی کیا ہے۔