شمالی وزیرستان : سکیورٹی فورسز کا انٹیلی جنس آپریشن، متعدد دہشتگرد ٹھکانے اور زیرِ زمین سرنگیں تباہ

شمالی وزیرستان(ڈیلی اردو) سکیورٹی فورسز نے شمالی وزیرستان میں انٹیلی جنس معلومات کی بنیاد پر کارروائی کرتے ہوئے دہشتگردوں کے متعدد مبینہ ٹھکانے اور زیرِ زمین سرنگوں کا نیٹ ورک تباہ کردیا۔

سکیورٹی ذرائع کے مطابق علاقے میں دہشتگرد عناصر کی موجودگی اور نقل و حرکت سے متعلق قابلِ اعتماد اطلاعات ملنے کے بعد انٹیلی جنس بیسڈ آپریشن کیا گیا۔ کارروائی کے دوران متعدد خفیہ ٹھکانے اور زیرِ زمین راستوں کی نشاندہی کرکے انہیں تباہ کردیا گیا، جس سے دہشتگردوں کے لیے افراد کو چھپانے اور مبینہ طور پر اسلحہ و بارودی مواد ذخیرہ کرنے کے لیے استعمال ہونے والا انفراسٹرکچر ختم ہوگیا۔

ذرائع کے مطابق کارروائی کے دوران بڑی مقدار میں دھماکا خیز مواد بھی برآمد کیا گیا۔ بعد ازاں علاقے میں سرچ آپریشن کے دوران مزید بارودی مواد ملا، جسے بم ڈسپوزل اسکواڈ کی معاونت سے محفوظ طریقے سے ناکارہ بنا دیا گیا۔

سکیورٹی ذرائع نے دعویٰ کیا ہے کہ آپریشن کے دوران متعدد دہشتگرد بھی ہلاک ہوئے، تاہم ہلاک ہونے والوں کی حتمی تعداد کا تعین کیا جا رہا ہے۔ ذرائع کے مطابق مزید تفصیلات تصدیق کے بعد سامنے آنے کا امکان ہے۔

کارروائی کے بعد اطراف کے علاقوں میں سرچ اور کلیئرنس آپریشن جاری ہے تاکہ ممکنہ طور پر چھپے دہشتگردوں، مزید خفیہ ٹھکانوں اور بارودی مواد کا سراغ لگایا جا سکے۔

سکیورٹی حکام کے مطابق شمالی وزیرستان اور دیگر حساس علاقوں میں دہشتگرد نیٹ ورکس کے خلاف انٹیلی جنس بنیادوں پر کارروائیاں جاری رہیں گی، جن کا مقصد مسلح عناصر کے خفیہ ٹھکانوں اور انفراسٹرکچر کو ختم کرکے مقامی آبادی کے تحفظ کو یقینی بنانا ہے۔