شمالی وزیرستان، لوئر دیر اور خیبر میں پرتشدد واقعات، اہلکار اور شہری ہلاک، متعدد زخمی

میرعلی + لوئر دیر + باڑہ (نمائندگان ڈیلی اردو)  پاکستان کے شورش زدہ صوبے خیبر پختونخوا کے قبائلی ضلع شمالی وزیرستان، لوئر دیر اور خیبر میں مختلف پرتشدد واقعات پیش آئے جن میں ایک ایلیٹ فورس اہلکار اور ایک شہری ہلاک جبکہ متعدد دہشت گرد ہلاک یا زخمی ہوئے۔

سرکاری ذرائع کے مطابق شمالی وزیرستان کے تحصیل میرعلی میں دہشت گردوں نے فائرنگ کر کے ایلیٹ فورس کے اہلکار محمد شعیب کو نشانہ بنایا، جو دوسلی کا رہائشی تھا۔ وہ موقع پر ہی ہلاک ہو گئے۔

دوسری جانب لوئر دیر کے علاقے لعل قلعہ میدان کے گاؤں لعلو میں نامعلوم مسلح افراد نے صبح سویرے ایک گھر پر دھاوا بول کر فیض الرحمن ولد شیر زادہ کو اغواء کیا۔ کچھ دیر بعد اس کی نعش نامباتئی خوڑ سے برآمد ہوئی۔ مقامی ذرائع کے مطابق واقعے میں چار مسلح افراد ملوث تھے۔

خیبر کی وادی تیراہ کے علاقے میدان پیر میلہ میں سکیورٹی فورسز نے کارروائی کرتے ہوئے متعدد دہشت گردوں کو نشانہ بنایا۔ ابتدائی اطلاعات کے مطابق کچھ دہشت گرد ہلاک اور کچھ زخمی ہوئے ہیں۔

علاقے میں خوف و ہراس پھیل گیا ہے جبکہ پولیس اور سکیورٹی فورسز نے تمام واقعات کی تحقیقات اور علاقے میں سرچ آپریشن شروع کر دیا ہے۔