شمالی کوریا کا مصنوعی ذہانت سے لیس جدید تارپیڈو کا تجربہ کامیاب ہونے کا دعویٰ

پیانگ یانگ(ڈیلی اردو) شمالی کوریا نے مصنوعی ذہانت کی ٹیکنالوجی سے لیس نئے زیرِ آب تارپیڈو کا تجربہ کرنے کا اعلان کیا ہے۔ پیانگ یانگ کے مطابق اس ہتھیار میں اہداف کی نشاندہی اور رہنمائی کے لیے مصنوعی ذہانت استعمال کی گئی ہے، جبکہ اس کی تیاری کا مقصد ملک کی بحری جنگی صلاحیتوں کو مزید بہتر بنانا ہے۔

عرب نشریاتی ادارے اسکائی نیوز عربیہ کے مطابق شمالی کوریا کی سرکاری خبر رساں ایجنسی نے ہفتے کو بتایا کہ یہ تجربہ جمعرات کو کیا گیا، جس میں نئے ہتھیار کے تکنیکی نظام میں ہونے والی بہتری کا جائزہ لیا گیا۔ سرکاری ایجنسی نے تجربے کو کامیاب قرار دیا۔

رپورٹ کے مطابق تارپیڈو کے نظامِ حرکت کو بہتر بنانے کے لیے گزشتہ پانچ برسوں کے دوران 180 سے زائد تجربات کیے گئے۔ شمالی کوریا کا دعویٰ ہے کہ نئے نظام میں مصنوعی ذہانت کی مدد سے ہدف کا سراغ لگانے اور ہتھیار کو اس کی جانب درست انداز میں لے جانے کی صلاحیت شامل ہے، جبکہ اسے تیز رفتار بھی قرار دیا گیا ہے۔

یہ پیش رفت ایسے وقت میں سامنے آئی ہے جب شمالی کوریا اپنی زیرِ آب جنگی صلاحیتوں اور آبدوزوں سے داغے جانے والے میزائلوں کے نظام کو بھی بہتر بنانے میں مصروف ہے۔ سرکاری میڈیا نے اس سے قبل آبدوزوں سے داغے جانے والے اسٹریٹجک کروز میزائلوں کے تجربات کی اطلاع بھی دی تھی۔

تاہم، شمالی کوریا کے اعلان کے باوجود نئے تارپیڈو کی عملی صلاحیت، اس کی آزادانہ تصدیق اور جنگی حالات میں مؤثریت کے بارے میں تفصیلات سامنے نہیں آئیں۔ اسی طرح ملک کی آبدوزوں سے میزائل داغنے کی حقیقی صلاحیت کے بارے میں بھی مکمل معلومات دستیاب نہیں ہیں۔