صوابی اور قبائلی اضلاع میں حملوں اور فائرنگ کے واقعات، دو پولیس اہلکار زخمی

پشاور (ڈیلی اردو رپورٹ ) پاکستان کے شورش زدہ صوبے خیبر پختونخوا کے ضلع صوابی کی بام خیل میں پولیس چوکی پر نامعلوم موٹر سائیکل سواروں کی جانب سے ہینڈ گرنیڈ حملہ کیا گیا، جس کے نتیجے میں ایک پولیس کانسٹیبل اور ایک پرائیویٹ باورچی زخمی ہو گئے۔ زخمیوں کو فوری طور پر ہسپتال منتقل کیا گیا۔ ڈی ایس پی صوابی کے مطابق واقعے کے بعد علاقے کو گھیرے میں لے کر سرچ آپریشن شروع کر دیا گیا ہے۔

خیبر: ضلع خیبر میں گزشتہ شب دو مختلف مقامات پر دھماکے ہوئے۔ مقامی ذرائع کے مطابق پہلا دھماکہ پاک افغان شاہراہ پر واقع ستارہ میل چیک پوسٹ کے قریب ہوا، جبکہ دوسرا دھماکہ مستان شاہ کے حجرے کے باہر پیش آیا۔ خوش قسمتی سے دونوں دھماکوں میں کوئی جانی نقصان نہیں ہوا، تاہم چار دیواری اور گیٹ کو نقصان پہنچا۔

جنوبی وزیرستان: کانیکگرام منڈی بطازار میں نامعلوم افراد کی فائرنگ سے ایک شخص ہلاک ہو گیا۔ ہلاک ہونے والے شخص کی شناخت لیاقت علی برکی عرف پیر کے نام سے ہوئی۔

شمالی وزیرستان: قبائلی رہنما ملک عبداللہ شاہ، جو جمعیت علمائے اسلام (ف) کے رہنما حافظ نوراللہ شاہ کے بھائی تھے، کو میرانشاہ میں نامعلوم مسلح افراد نے فائرنگ کر کے ہلاک کر دیا۔

پولیس اور سکیورٹی ادارے تمام واقعات کی تحقیقات میں مصروف ہیں اور علاقے میں سیکیورٹی سخت کر دی گئی ہے۔