ضلع کرم میں بارودی سرنگ کا دھماکہ، 3 بچے شدید زخمی

پاراچنار (نمائندہ ڈیلی اردو) صوبہ خیبر پختونخوا کے قبائلی ضلع ‏کرم کے علاقہ جمال میلہ میں بارودی سرنگ پھٹنے سے تین بچے شدید زخمی ہو گئے۔

تفصیلات کے مطابق وسطی کرم کے علاقے علی شیر زئی کے گاوں جمال میلہ میں بارودی سرنگ کا دھماکہ ہوا ہے جس کے نتیجے میں تین بچے شدید زخمی ہوگئے۔ مقامی ذرائع کا کہنا ہے کہ بچے گھر کے قریب پڑے بارودی مواد سے کھیل رہے تھے کہ اچانک زور دار دھماکہ ہوا۔

ذرائع کے مطابق دھماکے میں زخمی ہونے والے بچوں کی شناخت ابوبکر، مشاہد اور آصف کے ناموں سے ہوئی ہے جن کی عمریں 5 تا 7 سال کے درمیان بتائی جاتی ہیں۔ زخمیوں کا تعلق ایک ہی خاندان سے بتایا جاتا ہے۔ واقعہ کل شام پانچ بجے پیش آیا۔

ذرائع کا یہ بھی کہنا تھا کہ تینوں بچوں کو فوری طور پر صدہ ہسپتال منتقل کیا گیا جن میں سے آصف کی حالت تشویشناک بتائی جاتی ہے۔

واقعے کے بعد سیکیورٹی فورسز نے علاقے میں سرچ آپریشن شروع کردیا ہے۔