طائف میں حوثی ڈرون کے ملبے سے یمنی شہری ہلاک، پاکستانی سمیت دو افراد زخمی

ریاض (ڈیلی اردو) سعودی عرب کے شہر طائف میں حوثی باغیوں کی جانب سے داغے گئے ایک ڈرون کو روکنے کے بعد گرنے والے ملبے سے ایک یمنی شہری ہلاک جبکہ ایک پاکستانی شہری اور ایک سعودی خاتون زخمی ہوگئیں۔ سعودی حکام کے مطابق زخمی ہونے والے پاکستانی شہری کی حالت تشویشناک بتائی گئی ہے۔

سعودی محکمہ شہری دفاع نے بتایا کہ حوثی باغیوں کی جانب سے بھیجے گئے ڈرون کو کارروائی کے دوران فضا میں ہی روک کر تباہ کر دیا گیا، تاہم اس کے نتیجے میں ڈرون کے ٹکڑے مختلف مقامات پر آ گرے۔

حکام کے مطابق ملبے کی زد میں آ کر یمنی شہریت رکھنے والا ایک مقیم شخص ہلاک ہوگیا، جبکہ ایک سعودی خاتون اور ایک پاکستانی شہری زخمی ہوئے۔ پاکستانی شہری کی حالت تشویشناک ہونے کے باعث اسے طبی امداد فراہم کی جا رہی ہے۔

سعودی شہری دفاع کے مطابق ڈرون کے ملبے سے متعدد عمارتوں اور گاڑیوں کو بھی نقصان پہنچا ہے۔ واقعہ مکہ مکرمہ کے مشرق میں واقع طائف کے علاقے میں پیش آیا۔