عراق سے امریکی فوجی انخلا مکمل ہونے کا دعویٰ، تمام جنگی و لاجسٹک اہلکار روانہ

بغداد(ڈیلی اردو) عراقی حکومت کے ایک عہدیدار نے دعویٰ کیا ہے کہ ملک سے امریکی فوج کا مکمل انخلا ہوچکا ہے اور تمام جنگی و لاجسٹک معاونتی دستے عراق چھوڑ چکے ہیں۔

جرمن خبر رساں ادارے کے مطابق عراقی حکام کا کہنا ہے کہ امریکی فوجیوں کی واپسی کا عمل مکمل کرلیا گیا ہے، تاہم واشنگٹن کی جانب سے تاحال اس پیش رفت کی باضابطہ تصدیق سامنے نہیں آئی۔

امریکا اور عراق نے 2024 میں ملک میں امریکی زیر قیادت بین الاقوامی اتحاد کے فوجی مشن کے خاتمے اور غیر ملکی افواج کے انخلا کے لیے مرحلہ وار منصوبے پر اتفاق کیا تھا۔ عراق نے 30 ستمبر کو اس عمل کی حتمی تاریخ قرار دیا تھا، جبکہ اس کے بعد دونوں ممالک کے تعلقات کو سکیورٹی، تربیت، انٹیلی جنس اور دیگر شعبوں میں دوطرفہ تعاون کی بنیاد پر آگے بڑھانے کا منصوبہ ہے۔

تازہ انخلا سے قبل عراق میں امریکی فوجی موجودگی اربیل، بغداد کے قریب ایک فوجی اڈے اور دارالحکومت کے گرین زون سمیت چند مقامات تک محدود تھی۔ گزشتہ برسوں کے دوران عراق میں امریکی فوجیوں کی تعداد تقریباً 2500 بتائی جاتی رہی ہے۔

امریکی فوج 2014 میں عراقی حکومت کی درخواست پر داعش کے خلاف قائم بین الاقوامی اتحاد کے حصے کے طور پر دوبارہ عراق پہنچی تھی۔ اس سے قبل 2011 میں امریکی جنگی دستوں نے عراق سے انخلا کیا تھا۔

عراق میں داعش کو 2017 میں علاقائی طور پر شکست دی گئی تھی، تاہم تنظیم کے خفیہ نیٹ ورک اب بھی بعض علاقوں میں موجود ہیں اور وقفے وقفے سے حملے کرتے رہے ہیں۔

عراقی حکام کے مطابق امریکی فوجی مشن کے اختتام کے بعد ملک کی سکیورٹی کی بنیادی ذمہ داری عراقی فورسز کے پاس ہوگی، جبکہ امریکا اور عراق کے درمیان مستقبل میں سکیورٹی تعاون کو دوطرفہ بنیادوں پر جاری رکھنے کی توقع ہے۔