عراق: کردستان میں 4 نامعلوم ڈرون گر کر تباہ، مکان کو نقصان، پہاڑی علاقے میں آگ بھڑک اٹھی

بغداد(ڈیلی اردو) عراق کے خودمختار کردستان ریجن کے دارالحکومت اربیل کے شمالی علاقوں میں بدھ کی صبح چار نامعلوم ڈرون مختلف مقامات پر گر کر تباہ ہوگئے، تاہم ابتدائی اطلاعات کے مطابق واقعے میں کسی جانی نقصان کی اطلاع نہیں ملی۔

مقامی ذرائع کے مطابق ایک ڈرون کا ملبہ سوران کے مرکزی علاقے میں ایک شہری مکان پر گرا، جس کے نتیجے میں عمارت کو مالی نقصان پہنچا۔

ذرائع کا کہنا ہے کہ دو دیگر ڈرون خلیفان کے علاقے سے منسلک ایک گاؤں کے قریب گر کر تباہ ہوئے، جبکہ چوتھا ڈرون حرير کے علاقے میں بنی حرير پہاڑ پر جاگرا۔

ڈرون گرنے کے نتیجے میں پہاڑی علاقے کی جھاڑیوں میں آگ بھڑک اٹھی، جس پر قابو پانے کے لیے متعلقہ اداروں کی جانب سے کارروائی کی گئی۔

ابتدائی اطلاعات کے مطابق چاروں ڈرون کی شناخت اور ان کے گرنے کی وجوہات تاحال معلوم نہیں ہوسکیں، جبکہ واقعے سے متعلق مزید معلومات جمع کی جا رہی ہیں۔