غزہ: اسرائیلی حملوں اور فائرنگ سے بچی سمیت 6 فلسطینی ہلاک، متعدد زخمی

غزہ(ڈیلی اردو) غزہ میں ہفتے کے روز اسرائیلی فضائی حملوں اور فائرنگ کے نتیجے میں ایک آٹھ سالہ بچی سمیت 6 فلسطینی ہلاک جبکہ متعدد زخمی ہوگئے۔ اسکائی نیوز عربیہ کے نامہ نگار کے مطابق مختلف واقعات میں جانی نقصان ہوا۔

رپورٹ کے مطابق غزہ شہر کے مغربی علاقے الرمال میں راہ گیروں کے ایک گروپ کو نشانہ بنانے والے اسرائیلی حملے میں 4 فلسطینی ہلاک ہوئے۔ اسی علاقے کے قریب واقع بے گھر افراد کے لیے قائم الجوازات کیمپ میں اسرائیلی کواڈ کاپٹر ڈرون کی فائرنگ سے آٹھ سالہ شہد عبدالرزاق النجار ہلاک ہوگئی۔

ایک اور واقعے میں غزہ شہر کے مشرقی علاقے التفاح پر اسرائیلی حملے کے نتیجے میں ایک فلسطینی ہلاک اور متعدد زخمی ہوگئے۔ فلسطینی خبر رساں ادارے ’’سوا‘‘ نے طبی ذرائع اور الشفا میڈیکل کمپلیکس کے حوالے سے ہلاکتوں اور زخمیوں کی تصدیق کی ہے۔