غزہ جنگ: اسرائیل کیلئے جرمن ہتھیاروں کی ترسیل دوبارہ شروع

برلن (ڈیلی اردو/اے ایف پی/ڈی پی اے) غزہ پٹی میں جاری سیزفائر کے پیش نظر جرمنی کی وفاقی مخلوط حکومت نے اعلان کیا ہے کہ وہ اسرائیل کو جرمن ہتھیاروں کی فراہمی پر عائد جزوی پابندی ختم کرنے کا ارادہ رکھتی ہے۔

سرکاری رپورٹوں کے مطابق جرمن چانسلر فریڈرش میرس کی قیادت میں حکومت نے فیصلہ کیا ہے کہ غزہ میں استعمال کے لیے اسرائیل کو ہتھیاروں کی ترسیل کی جزوی معطلی اب ختم کی جائے گی۔

حکومتی ترجمان شٹیفان کورنیلیئس نے کہا، ’’جرمن حکومت اس سیزفائر معاہدے کا خیر مقدم کرتی ہے، جس پر غزہ میں 10 اکتوبر سے نفاذ کے بعد سے عمل ہو رہا ہے اور جس میں حالیہ ہفتوں میں کافی استحکام آیا ہے۔‘‘

انہوں نے مزید کہا کہ حکومت اب اسرائیل کو ہتھیاروں کی فراہمی کے عمل کی طرف واپس لوٹ رہی ہے اور ہر فیصلے کا انفرادی طور پر جائزہ لیا جائے گا، مستقبل میں غزہ میں پیش آنے والے حالات پر مکمل نظر رکھتے ہوئے۔

واضح رہے کہ اس جزوی پابندی کا اطلاق اس سال اگست میں کیا گیا تھا، جب اسرائیلی حملوں میں عام فلسطینی شہریوں کی ہلاکتیں بڑھ گئی تھیں۔ اس وقت جرمن چانسلر میرس نے پابندی کا اعلان کیا تھا، جس پر بعض حلقوں نے یہ تنقید کی تھی کہ برلن حکومت نے اسرائیل کو ہر قسم کے ہتھیار برآمد کرنے پر مکمل پابندی کیوں نہیں لگائی۔